Random image

ஈரோட்டில் கொரோனா சிகிச்சையில் இருந்த 13 பேர் குணம்: கைதட்டி அனுப்பி வைத்த மருத்துவர்கள்

ஈரோடு: ஈரோடு மாவட்டத்தில் கொரோனா சிகிச்சை பெற்று வந்த 13 பேர் குணமடைந்த நிலையில் இன்று வீடு திரும்பினர்.

தமிழகத்தில் கொரோனா வைரஸ் நோய்த் தொற்றால் மொத்தம் பாதிக்கப்பட்டோரின் எண்ணிக்கை தொடர்ந்து அதிகரித்துள்ளது. இதில் ஈரோடு மாவட்டத்தில் கொரோனா தொற்று உறுதி செய்யப்பட்டோரின் எண்ணிக்கை 64 ஆக உள்ளது.

அவர்களில் 4 பேர் ஏற்கெனவே கோவை இஎஸ்ஐ மருத்துவமனையில் சிகிச்சை பெற்று குணமடைந்து வீடு திரும்பினர். 65 வயது முதியவர் ஒருவர் சிகிச்சை பலனின்றி உயிரிழந்தார்.

ஈரோடு பெருந்துறை அரசு மருத்துவமனையில் சிகிச்சை பெற்று வந்த 59 பேரில் தற்போது 13 பேர் சிகிச்சை பெற்று குணமடைந்த நிலையில் இன்று வீடு திரும்பினர். மாவட்ட ஆட்சியர் கதிரவன் அவர்களுக்கு பூங்கொத்து கொடுத்து வழியனுப்பி வைத்தார்.

மேலும், மருத்துவர்கள், சுகாதார ஊழியர்கள் கைதட்டி அவர்களை வழியனுப்பி வைத்தனர். எஞ்சிய 46 பேர் தொடர்ந்து மருத்துவமனையில் சிகிச்சை பெற்று வருகின்றனர்.