மே.இ.தீவுகளுக்கு எதிரான கடைசி டி20 போட்டியில் இளம் வீரர்களுக்கு வாய்ப்பு அளித்த பிசிசிஐ

இந்தியா மற்றும் மேற்கிந்தியத் தீவுகள் அணிகள் மோதும் கடைசி டி20 போட்டிக்கான அணியை பிசிசிஐ அறிவித்துள்ளது. உமேஷ் யாதவ், பும்ரா மற்றும் குல்தீப் யாதவ் உள்ளிட்ட வீரர்களுக்கு ஓய்வு அளிக்கப்பட்டு ஸ்ரேயாஸ் ஐயர், சபாஸ் நதீம் மற்றும் சித்தார்த் கவுல் உள்ளிட்ட இளம் வீரர்களுக்கு வாய்ப்பு அளிக்கப்பட்டுள்ளது.

3rd

இந்தியாவிற்குச் சுற்றுப்பயணம் மேற்கொண்டுள்ள மேற்கிந்தியத் தீவுகள் அணி 2 டெஸ்ட், 5 ஒருநாள் மற்றும் 3 டி20 போட்டிகள் கொண்ட தொடரில் விளையாடி வருகிறது. இதில் டெஸ்ட் தொடரை இந்திய அணி 2-0 என்ற கணக்கில் வெற்றி பெற்றது. அதைத்தொடர்ந்து நடைபெற்ற ஒருநாள் தொடரை இந்திய அணி 3-1 என்ற கணக்கில் வெற்றி பெற்றது.

இந்நிலையில், இவ்விரு அணிகளும் 3 போட்டிகள் கொண்ட டி20 தொடரில் தற்போது விளையாடி வருகிறது. இதில், ஏற்கனவே நடைபெற்ற இரண்டு போட்டிகளிலும் இந்திய அணி வெற்றிபெற்று, தொடரைக் கைப்பற்றியது.

இதையடுத்து, இரு அணிகளுக்கும் இடையேயான கடைசி மற்றும் 3வது டி20 போட்டி நாளை சென்னை சேப்பாக்கம் மைதானத்தில் நடைபெற உள்ளது. இதைத் தொடர்ந்து, நாளை நடைபெறும் போட்டிக்கான ரோஹித் தலைமையிலான இந்திய அணியை பிசிசிஐ அறிவித்துள்ளது.

இதில் உமேஷ் யாதவ், பும்ரா மற்றும் குல்தீப் யாதவ் போன்ற முக்கிய வீரர்களுக்கு ஓய்வு வழங்கப்பட்டுள்ளது. அவர்களுக்குப் பதிலாக ஸ்ரேயாஸ் ஐயர், சபாஸ் நதீம் மற்றும் சித்தார்த் கவுல் உள்ளிட்ட இளம் வீரர்களுக்கு வாய்ப்பு வழங்கப்பட்டுள்ளது.