Random image

தமிழ்நாடு: கடந்த 5 வருட பேருந்து விபத்துகளில் 7 ஆயிரம் பேர் பலி!

தமிழகத்தில் கடந்த ஐந்து வருடங்களில் நிகழ்ந்த 6,132 அரசு பேருந்து விபத்துகளில், 6,729 பேர் பலியாகியிருப்பதாக போக்குவரத்து துறை அமைச்சர் எம்.ஆர்.விஜயபாஸ்கர் தெரிவித்துள்ளார்.

தமிழக சட்டபேரவையில் நேற்று பேருந்து போக்குவரத்து துறை மீதான மானிய கோரிக்கை நடைபெற்றது. அதில் விபத்தில் சிக்கிய அரசு பேருந்துகள் குறித்த தகவல்களை போக்குவரத்து துறை அமைச்சர் எம்.ஆர்.விஜயபாஸ்கர் வெளியிட்டார்.

அதன்படி கடந்த 2013 முதல் 2018-ஆம் ஆண்டு வரையிலான ஐந்து வருடங்களில்   6,132 விபத்துகள் நடைபெற்றதாகவும், அதில் 6,729 பேர் பலியானதாகவும் அவர் கூறினார்.

மேலும் விபத்துக்களை தடுக்க தமிழக அரசு தீவிர நடவடிக்கை மேற்கொண்டுள்ளதாகவும், நீண்ட நேரம் இயக்கப்படும் பேருந்து ஓட்டுநர்கள் மற்றும் ஊழியர்களுக்கு ஓய்வு அளிக்கப்படுவதாகவும் அமைச்சர் எம்.ஆர்.விஜயபாஸ்கர் கூறினார்.

விபத்தில் பலியானோருக்கு இழப்பீடுத் தொகையை வழங்க  பயணிகளிடம் இருந்து டிக்கெட்டில் ரூ.1 முதல் ரூ.10 வரை கட்டணம் வசூலிக்கப்படுகிறது. இதன்மூலம் விபத்து காப்பீடு அளிக்கப்படும். கடந்த ஜனவரி முதல் இது நடைமுறைப்படுத்தப்பட்டுள்ளது.

மேலும் விபத்தில் பாதிக்கப்பட்டவர்களுக்கு விரைவில் இழப்பீடு தொகை பெற ஒரு கமிட்டி அமைக்கப்பட்டுள்ளது என்றும் அதன் மூலம் விபத்தில் பலியானோர் குடும்பத்துக்கு உடனடியாக இழப்பீடு தொகை வழங்கப்படுகிறது என்றும் அமைச்சர் எம்.ஆர்.விஜயபாஸ்கர் கூறினார்.