Random image

இங்கிலாந்து: முதல் மற்றும் கடைசி போட்டியில் சதம் அடித்த 5வது வீரர் அலஸ்டைர் குக்…..அசத்தல் சாதனை

லண்டன்:

டெஸ்ட் கிரிக்கெட்டில் முதல் மற்றும் இறுதி போட்டியில் சதம் அடித்த 5வது வீரர் என்ற பெருமையை இங்கிலாந்து வீரர் அலஸ்டைர் குக் பெற்றுள்ளார்.

இங்கிலாந்து கிரிக்கெட் அணியின் முன்னணி தொடக்க பேட்ஸ்மேன் அலஸ்டைர் குக். இவர் 2006-ம் ஆண்டு இந்தியாவிற்கு எதிரான நாக்பூர் டெஸ்ட் போட்டியிட் அறிமுகமானார். தொடக்க வீரராக களம் இறங்கிய குக் முதல் இன்னிங்சில் 60 ரன்களும், 2-வது இன்னிங்சில் ஆட்டமிழக்காமல் 104 ரன்களும் அடித்து சாதித்தார்.

தற்போது லண்டன் ஓவல் மைதானத்தில் நடைபெற்ற ஆட்டத்தோடு அலஸ்டைர் குக் சர்வதேச போட்டியில் இருந்து ஓய்வு பெறுகிறார். முதல் இன்னிங்சில் 71 ரன்கள் எடுத்து ஆட்டமிழந்தார். 2-வது இன்னிங்சில் அபாரமான ஆட்டத்தை வெளிப்படுத்தி சதம் அடித்தார். 210 பந்தில் 8 பவுண்டரியுடன் சதம் அடித்த குக், 4-வது நாள் மதிய உணவு இடைவேளை வரை 103 ரன்கள் எடுத்து ஆட்டமிழக்காமல் உள்ளார்.

அறிமுக போட்டியில் சதம் அடித்த அலஸ்டைர் குக் இறுதி டெஸ்ட் போட்டியிலும் சதம் அடித்துள்ளார். இவர் மேலும் பல்வேறு சாதனைகளுடன் ஓய்வு பெறுகிறார். இவரது சாதனை பட்டியல்……

# டெஸ்ட் போட்டியின் 3-வது இன்னிங்சில் 13 சதம் அடித்து அதிக சதம் அடித்தவர்கள் பட்டியலில் முதல் இடத்தில் உள்ளார்.

# ஒரு அணியின் 2-வது இன்னிங்சில் 15 சதம் அடித்து முதல் இடத்தில் உள்ளார். சங்ககரா 14 சதங்களுடன் 2-வது இடத்தில் உள்ளார்.

# இந்தியாவிற்கு எதிராக 7 சதங்கள் அடித்து, இந்தியாவிற்கு எதிராக அதிக சதங்கள் அடித்த இங்கிலாந்து வீரர் என்ற பெருமையை பெற்றுள்ளார். கெவின் பீட்டர்சன் 6 சதங்களுடன் 2-வது இடத்தில் உள்ளார்.

# அறிமுகம் மற்றும் கடைசி டெஸ்டில் சதம் அடித்த 5வது வீரர் என்ற பெருமையை பெற்றுள்ளார். கிரேக் சேப்பல், முகமது அசாருதீன், பில் போன்ஸ்ஃபோர்டு, ரெஹ்கி டஃப் ஆகியோர் இதற்கு முன் சதம் அடித்துள்ளனர்.

# அத்துடன் இந்தியாவிற்கு எதிராக அதிக ரன்கள் குவித்த 2-வது வீரர் என்ற பெருமையை பெற்றுள்ளார். ரிக்கி பாண்டிங் 2555 ரன்கள் அடித்துள்ளார். குக் 2362 ரன்கள் அடித்துள்ளார்.

#டெஸ்ட் கிரிக்கெட்டில் அதிக ரன்கள் குவித்த இடது கை பேட்ஸ்மேன் என்ற பெருமைய பெற்றுள்ளார். சங்ககரா 12400 ரன்கள் அடித்துள்ளார். அலஸ்டைர் குக் அதை தாண்டியுள்ளார்.

# பார்ட்னர்ஷிப்பில் 77 முறை சதம் அடித்துள்ளார்.