“அரியானா முதல்-அமைச்சர் மன்னிப்பு கேட்க வேண்டும்” பஞ்சாப் முதல்வர் ஆவேசம்..

 

மத்திய அரசின் புதிய வேளாண் சட்டத்துக்கு எதிர்ப்பு தெரிவித்து பஞ்சாப் மாநில விவசாயிகள் தொடர் போராட்டத்தில் ஈடுபட்டுள்ளனர்.

டெல்லியில் போராட்டம் நடத்த சென்ற பஞ்சாப் விவசாயிகள் மீது அரியானா போலீசார் பலப்பிரயோகம் செய்தனர். இதற்கு பஞ்சாப் முதல்-அமைச்சர் அமரீந்தர் சிங் கடும் கண்டனம் தெரிவித்துள்ளார்.

“பஞ்சாப் விவசாயிகள் மீது அரியானாவில் கண்ணீர் புகை குண்டுகள் வீசப்பட்டுள்ளன. தண்ணீரை பீய்ச்சி அடித்தும் தாக்குதல் நடந்துள்ளது. இதற்காக அரியானா முதல்-அமைச்சர் மனோகர் லால் கட்டார் மன்னிப்பு கேட்க வேண்டும்.” என ஆவேசமாக அமரீந்தர் சிங் தெரிவித்தார்.

“பஞ்சாப் விவசாயிகள் சட்டம்- ஒழுங்கை குலைத்து விட்டதாக கட்டார் கூறுகிறார். பஞ்சாப் விவசாயிகள் சட்டத்தை மதிப்பவர்கள்” என குறிப்பிட்ட அமரீந்தர் சிங். “தனது தவறை கட்டார் ஒப்புக்கொள்ள வேண்டும், இல்லையென்றால் அவரை நான் மன்னிக்க மாட்டேன்” என தெரிவித்தார்.

– பா. பாரதி