Random image

ஆஸ்திரேலியாவை விடாமல் விரட்டும் அந்த மோசமான சென்டிமென்ட்!

இந்திய அணிக்கெதிரான டெஸ்ட்டில், முதல் இன்னிங்ஸ் நிலவரப்படி, ஆஸ்திரேலிய அணி 33 ரன்கள் முன்னிலைப் பெற்றால், ஆஸ்திரேலியா தோற்றுவிடும் என்ற சென்டிமென்ட், 2021 பிரிஸ்பேன் டெஸ்ட்டிலும் உண்மையாகிவிட்டது.

கடந்த 1979ம் ஆண்டு, ஆஸ்திரேலிய மண்ணில், இந்தியா – ஆஸ்திரேலியா மோதிய டெஸ்ட் போட்டியில், ஆஸ்திரேலிய அணி முதல் இன்னிங்ஸில் 33 ரன்கள் முன்னிலைப் பெற்றது. இந்தப் போட்டியில் இந்திய அணி 153 ரன்கள் வித்தியாசத்தில் பெரிய வெற்றி பெற்றது.

அதேபோன்று, கடந்த 2003ம் ஆண்டு நடைபெற்ற அடிலெய்டு டெஸ்ட்டில், இந்தியா – ஆஸ்திரேலியா மோதிய போட்டியில், முதல் இன்னிங்ஸில் இந்தியாவைவிட 33 ரன்கள் முன்னிலைப் பெற்றது ஆஸ்திரேலியா. ஆனால், அப்போட்டியில், 4 விக்கெட் வித்தியாசத்தில் இந்தியாவிடம் தோல்வியடைந்தது ஆஸ்திரேலியா.

நடந்துமுடிந்த பிரிஸ்பேன் டெஸ்ட்டில், முதல் இன்னிங்ஸில் ஆஸ்திரேலியா 369 ரன்கள் எடுக்க, இந்திய அணி 336 ரன்கள் எடுத்து 33 ரன்கள் பின்தங்கியது. ஆனால், பழைய சென்டிமென்ட் படி, இந்திய அணி 3 விக்கெட் வித்தியாசத்தில் ஆஸ்திரேலியாவை வீழ்த்திவிட்டது.