ஆலயதரிசனம்… தெப்பக்குளம் மாரியம்மன்..
- மதுரையில் உள்ள பிரசித்தி பெற்ற கோயில்களில் விழா நடக்கும் முன்பு முதல் பூஜை இந்த மாரியம்மனுக்கே செய்யப்படுகிறது.
- கோயிலுடன் சேர்ந்துள்ள தெப்பம் மதுரை வட்டாரத்திலேயே மிகப்பெரிய தெப்பம் எனும் பெருமையினை உடையது.
- பிற அம்மன் கோயில்களில் இல்லாத விதமாக இங்கு அம்மனின் இடது காலுக்கு கீழே மகிஷாசுரன் இருக்கிறான்.
- வண்டியூரில் வசிக்கும் மக்கள் எந்த விசேஷங்கள் நடத்தினாலும், முதலில் அம்மனிடம் உத்தரவு கேட்ட பின்பே நடத்துகிறார்கள்.
- மாரியம்மனும், துர்க்கையும் வேறு வேறு வடிவங்களாக இருந்த போதிலும், இருவரும் அம்பிகையின் அம்சமாகவே திகழ்கின்றனர்.
- இதனை உணர்த்தும் விதமாக இக்கோயிலில் இருவரும் சேர்ந்த அமைப்பில் காட்சி தருகின்றனர். ஒரே அம்பிகையில், இரு அம்பாள்களை தரிசனம் செய்வது அபூர்வம்.
- அன்னை சிரித்த கோலத்தில், கைகளில் பாசம், அங்குசம் ஏந்தி காட்சி தருகிறாள். இடது காலை தொங்க விட்டு, வலது காலை மடக்கி அமர்ந்து அருளாட்சி செய்கிறாள்.
- பொதுவாக அம்மனின் காலுக்கு கீழே அசுரன் உருவம் இருக்கும். ஆனால் அன்னை துர்க்கையின் அம்சமாக இருப்பதால் காலுக்கு கீழே மகிஷாசுரன் இருக்கிறான்.
- திருமலை நாயக்கர் மன்னர் அக்காலத்தில் மகால் கட்டிய போது கட்டுமான பணிகளுக்கு தேவையான மணல், அம்மன் கோயிலுக்கு வலப்புறம் இருந்து தோண்டி எடுக்கப்பட்டது.
- மணல் தோண்டியதால் பள்ளமாக இருந்த பகுதியை சீரமைக்க, சதுர வடிவில் வெட்டி, தெப்பக்குளமாக மாற்றி அதன் நடுவே வசந்த மண்டபம் ஒன்றினையும் கட்டினார்.
- தெப்பம் தோண்டும் போது கிடைத்த முக்குறுணி விநாயகர் சிலை மீனாட்சியம்மன் கோயிலில் வழிபாட்டிற்காக வைக்கப்பட்டுள்ளது.
- வைகை கரையில் உள்ள வண்டியூரின் மேல் மடைக்கு நேரே இத்தெப்பம் கலை நயத்துடன் மன்னர் கால கட்டடக் கலைக்கு சான்றாக விளங்குகிறது.
- தெப்பத்திருவிழாவின் போது மீனாட்சியம்மன் இங்குள்ள தெப்பத்தின் நடுவே உள்ள வசந்த மண்டபத்திற்கு கொண்டுவரப்பட்டு சிறப்பு அபிஷேகங்கள் செய்யப்படுகின்றன.
- இங்கு அம்பாள் பிரதானம் என்பதால், வேறு பரிவார தெய்வங்கள் கிடையாது. அரசமரத்தின் அடியில் விநாயகர் மற்றும் பேச்சியம்மன் மட்டும் இருக்கின்றனர்.
- மதுரையை ஆட்சி செய்த மன்னர்கள், போருக்கு செல்லும் முன்பு வீரத்துடன் செயல்படவும், வெற்றி பெறவும் அன்னையே வணங்கியுள்ளனர்.
- கூண்பாண்டியன் ஆட்சி புரிந்த போது மதுரையின் கிழக்கே, கோயில் வீற்றிருக்கும் பகுதி மகிழ மரங்கள் நிறைந்த காடாக இருந்தது.
- காட்டினை குறும்பர் எனும் இனத்தவர்கள் ஆக்கிரமிப்பு செய்து பகுதியை அழித்து வந்தனர். நாளுக்கு நாள் குறுப்பர்களின் தொந்தரவு அதிகரிக்கவே, மன்னர் குறும்பரை அடக்கி விரட்டியடித்தார்.
- வைகையில் கிடைத்த அம்மனை தெற்கு கரையில் தற்போது கோயில் வீற்றுள்ள பகுதியில் வைத்து பிரதிஷ்டை செய்து வழிபட்டதாக வரலாறுகள் தெரிவிக்கின்றன.
- அம்மை நோய், தோல் நோய்கள், குழந்தைகளுக்கு ஏற்படும் அனைத்து நோய்கள், தீராத வியாதிகள் தீர இங்கு வேண்டிக் கொள்ளப்படுகிறது.
- குழந்தைகளின் நோய்கள் தீர, குழந்தை தத்துக்கொடுத்து வாங்கி, மண்சிலைகள் கொடுத்து, கரும்புத்தொட்டில்கள் கட்டப்படும் நிகழ்ச்சியும் நடக்கிறது.
- அம்மனுக்கு தீச்சட்டி, பால்குடம் மற்றும் மாவிளக்குகள் எடுத்து, சிறப்பு அபிஷேகங்கள் செய்யப்படுகின்றன.
- அம்மனுக்கு அபிஷேகம் செய்த தீர்த்தத்தை, மூலஸ்தானத்தில் பெரிய பாத்திரத்தில் வைக்கிறார்கள், தீர்த்தம் மிகவும் விசேஷமானது.
- கண் நோய், அம்மை உள்ளவர்கள் அம்மனை வணங்கி தீர்த்தத்தை பருகினால் நோய்கள் நீங்குவதாக நம்பிக்கை.
- ஒரு நாளில் மட்டும் நூற்றுக் கணக்கான பக்தர்கள் இவ்வாறு தீர்த்தம் வாங்கிச் செல்வது சிறப்பம்சம்.
- தோல் சம்பந்தப்பட்ட வியாதி உள்ளவர்கள் அம்பிகைக்கு உப்பு நேர்த்திக்கடன் செலுத்தி வேண்டிக் கொள்கிறார்கள்.
- அம்பிகை, துர்க்கையின் அம்சம் என்பதால் செவ்வாய்க் கிழமை எலுமிச்சை தீபமேற்றியும் வேண்டிக் கொள்கிறார்கள்.
- தைப்பூசத்தன்று தெப்பத் திருவிழாவும், பங்குனி மாதத்தில் பத்து நாள் பிரமோற்சவத்திருநாளும், பூச்சொரிதல் திருவிழா கோயிலின் முக்கிய திருவிழாக்களாக உள்ளது.
- மதுரை வாழ் மக்களின் குலம் தழைக்க செய்யும் குலதெய்வமாக அன்னை அருள்புரிகிறாள்.
- தல விருட்சம் வேம்ப மற்றும் அரச மரம், தீர்த்தம் தெப்பக்குளம், உற்சவ அம்மனாக நின்ற நிலையிலும் அருள்பாலிக்கிறாள்.
- ஆலய முகவரிஅருள்மிகு மாரியம்மன் திருக்கோயில், தெப்பக்குளம், வண்டியூர் – 625 009. மதுரை மாவட்டம்.
நன்றி : நெட்டிசன் அசோக் குமார் முகநூல் பதிவு