தனது பேட்டிங்கை விமர்சித்த ரசிகரை நாட்டை வீட்டு வெளியேற சொன்ன விராத்!!!

இந்திய அணியின் கேப்டன் விராத் கோலி, தனது பேட்டிங் பிடிக்காது என தெரிவித்த ரசிகரை நாட்டை விட்டுப் போகுமாறு கூறியது சர்ச்சையை ஏற்படுத்தியுள்ளது.

இந்தியக் கிரிக்கெட் அணியின் கேப்டனாகத் திகழ்பவர் விராத் கோலி. ஒருநாள் போட்டி, டெஸ்ட் போட்டி, டி20 போட்டி என அனைத்து வகையான போட்டிகளிலும் சிறப்பான ஆட்டத்தை வெளிப்படுத்தி வருகிறார்.

virat

சமீபத்தில் நடைபெற்ற மேற்கிந்தியத் தீவுகள் அணியுடனான ஒருநாள் தொடரில், விராத் கோலி தொடர்ச்சியாக 3 சதங்களை அடித்து சாதனைப் படைத்தார். மேலும், ஒருநாள் போட்டிகளில் விரைவாக 10 ஆயிரம் ரன்களைக் கடந்த வீரர் என்றப் பெருமையையும் விராத் கோலி பெற்றார்.

தற்போது ஓய்வில் இருக்கும் விராத் கோலி, நிகழ்ச்சி ஒன்றில் பங்கேற்ற போது, சமூக வலைத்தளங்களில் ரசிகர்கள் வெளியிட்ட கருத்திற்குப் பதிலளித்தார். அப்போது ரசிகர் ஒருவர், “அவர் (விராத் கோலி) அதிகமாக விளம்பரப்படுத்தப்படுகிறார். அவருடைய பேட்டிங்கில் எதுவும் சிறப்பாக இல்லை. எனக்கு இந்தியர்களை விட இங்கிலாந்து மற்றும் ஆஸ்திரேலிய பேட்ஸ்மேன்களின் ஆட்டத்தைக் காணவே பிடிக்கும் ” என தெரிவித்திருந்தார்.

இந்தக் கருத்திற்குப் பதிலளித்த விராத் கோலி, “ நீ இந்தியாவில் வாழக்கூடாது என நான் நினைக்கிறேன். வேறு எங்காவது போய் வாழ்க்கை நடத்து. மற்ற நாடுகளை நேசித்தால், அப்போது எதற்கு நமது நாட்டில் இருக்கிறாய்? உனக்கு என்னைப் பிடிக்கவில்லையென்றால் கவலையில்லை. மற்ற நாட்டவர்களைப் பிடித்தால், நீ நமது நாட்டில் வாழக்கூடாது என கருதுகிறேன். உனக்கு எது முதன்மையானது என்பதை தேர்ந்தெடு ” என கடுமையாக தாக்கி பதிலளித்துள்ளார்.

விராத் கோலியின் இந்தப் பதிலுக்கு ஒரு சிலர் ஆதரவு தெரிவித்தாலும், பலரும் கண்டனம் தெரிவித்து வருகின்றனர். ஒரு வீரரை விரும்புவது என்பது ஒருவரின் தனிப்பட்ட விருப்பம். அதற்காக நாட்டை விட்டு வெளியேற சொல்வதற்கு யாருக்கும் உரிமை இல்லை என பலரும் கூறி வருகின்றனர்.