கல்வி நிறுவனங்கள் கட்டணம் வசூலிக்க தடை விதித்த தமிழக அரசின் உத்தரவை எதிர்த்து வழக்கு

சென்னை :

மாணவர்களிடமிருந்து ‘குறைந்தபட்ச கட்டணம்’ வசூலிப்பதைத் தடுத்தால், ஆசிரியர்கள் மற்றும் பிற ஊழியர்களுக்கு தனியார் பள்ளிகள் எவ்வாறு சம்பளம் வழங்கும் என்று சென்னை உயர்நீதிமன்றம் கேள்வியெழுப்பியுள்ளது.

கொரோனா வைரஸ் காரணமாக கடந்த 3 மாதங்களுக்கும் மேலாக அமலில் உள்ள ஊரடங்கை கருத்தில் கொண்டு மாணவர்களிடமிருந்து கட்டணம் கோருவதையும் வசூலிப்பதையும் தடுக்கும் தமிழக அரசின் உத்தரவை எதிர்த்து பள்ளிகள் மற்றும் கல்லூரிகளின் சங்கங்கள் அளித்த மனுக்களை ஏற்றுக் கொண்ட நீதிபதி ஆர். மகாதேவன் இவ்வாறு கேள்வி எழுப்பியுள்ளார்.

தமிழ்நாட்டில் உள்ள தனியார் பள்ளிகளின் கூட்டமைப்பு, அகில இந்திய தனியார் கல்வி நிறுவனங்கள் சங்கம் மற்றும் தமிழ்நாட்டில் உள்ள சுய நிதியியல் நிபுணத்துவ, கலை மற்றும் அறிவியல் கல்லூரிகளின் கூட்டமைப்பு ஆகியவற்றின் சார்பில் வழக்கு தொடுக்கப்பட்டுள்ளது, இவர்கள் சார்பாக வாதாடிய மூத்த வழக்கறிஞர் கே. எம். விஜயன் கொரோனா வைரஸ் காரணமாக நிலவிவரும் சூழ்நிலையை கருதி, மாணவர்களிடம் கட்டணம் வசூலிக்க கூடாது என்று ஏப்ரல் 20 ம் தேதி அரசு உத்தரவு பிறப்பித்துள்ளதை சுட்டிக்காட்டினார்.

மேலும், ஆசிரியர்கள் மற்றும் இதர ஊழியர்களுக்கு சம்பளம் வழங்குவதை நிறுத்தக்கூடாது என்றும் அந்த உத்தரவில் கூறியுள்ளது, மாணவர்களிடம் வசூலிக்கப்படும் கட்டணத்தை மட்டுமே நம்பி செயல்படும் கல்வி நிறுவனங்கள் வருமானம் இல்லாமல் எவ்வாறு தனது ஊழியர்களுக்கு சம்பளம் வழங்க முடியும் என்றும் அரசின் இந்த உத்தரவு பேரழிவு மேலாண்மை சட்டம், 2005, கீழ் வழங்கப்பட்டுள்ளது என்றும் இந்த சட்டம் பேரழிவை நிர்வகிக்கும் நோக்கத்திற்காக மட்டுமே இயற்றப்பட்டது, தனிநபர்களின் நிதி மேலாண்மை அல்லது பள்ளிகள் அல்லது கல்லூரிகளின் நிர்வாகங்களுக்கு இதில் தொடர்பில்லை என்றும் வாதிட்டார். தமிழ்நாட்டில் மட்டும் தான் இதுபோன்ற தடை விதிக்கப்பட்டுள்ளது என்றும் மூத்த வழக்கறிஞர் விஜயன் தனது வாதத்தில் குறிப்பிட்டார்.

அனைத்து தனியார் கல்வி நிறுவனங்களும் தங்கள் ஆசிரியர்கள் மற்றும் பிற ஊழியர்களுக்கு சம்பளம் வழங்க வேண்டும் என்பது அரசாங்கத்தின் கொள்கை முடிவு. “கிட்டத்தட்ட எல்லா கல்வி நிறுவனங்களும் ஆன்லைன் வகுப்புகளை நடத்தும் நிலையில், அரசு உதவி பெறாத கல்வி நிறுவனங்கள் குறைந்தபட்ச கட்டணங்களை வசூலிக்கக் கூடத் தடை விதித்தால், அவர்கள் எவ்வாறு சம்பளம் கொடுப்பார்கள்” என்று வழக்கு விசாரணையின் போது நீதிபதி கருத்து தெரிவித்தார், இந்த மனுவுக்கு ஜூன் 30 க்குள் தனது பதிலை தாக்கல் செய்யுமாறு மாநில அரசுக்கு நோட்டீஸ் அனுப்பி உத்தரவிட்டார்.