ஆன்டிஜென் பரிசோதனையில் தவறான கோவிட்-19 “நெகடிவ்” முடிவுகள்: ஆர்.டி-பி.சி.ஆர் சோதனைகளைத் தொடரும் தமிழகம்

கோவிட் -19-க்கான ஆன்டிஜென் சோதனைகளில் “நெகடிவ்” என அறியப்பட்ட மிக அதிக எண்ணிக்கையிலான சோதனைகள், பின்னர் ஆர்டி-பிசிஆர் சோதனையில் “பாசிடிவ்” என அறியப்பட்டதால் தமிழகம், மகாராஷ்டிரம் போன்ற மாநிலங்களில் பெறப்பட்ட சோதனை முடிவுகள் சந்தேகத்திற்கு இடமாகியுள்ளன. மேலும், தமிழகம் ஆன்டிஜென் சோதனைகளைக் கைவிட்டு, ஆர்.டி-பிசிஆர் சோதனைகளைத் தொடருகிறது.

மும்பையின் இரு பெரிய ஆய்வகங்களில் பெறப்பட்ட முடிவுகளில் சுமார் 65% “நெகடிவ்” முடிவுகளைப் பெற்ற அறிகுறிகளைக் கொண்ட நோயாளிகள் பின்னர் ஆர்டி-பி.சி.ஆர் பரிசோதனையில் “பாசிடிவ்” முடிவுகளைப் பெற்றனர். இது ஆன்டிஜென் சோதனைகளில் தவறான “நெகடிவ்” முடிவுகளின் அபாயத்தை அடிக்கோடிட்டுக் காட்டுகிறது. ஜூன் 18 முதல் ஜூலை 21 வரை, ஆர்டி-பி.சி.ஆர் சோதனையில் “நெகடிவ்” முடிவுகளைப் பெற்ற சுமார் 15% நோயாளிகளுக்கு பின்னர் வைரஸ் தொற்று இருப்பது உறுதி செய்யப்பட்டது. இதன் மூலம்
‘ஆன்டிஜென் சோதனை முடிவுகள் வைரஸ் பரவலை சரியாக கண்டறியவில்லை என்பது உண்மையாகிறது.

விரைவான ஆன்டிஜென் முறையைப் பயன்படுத்தி டெல்லியில் 3.6 லட்சத்துக்கும் மேற்பட்ட மாதிரிகள் சோதனை செய்யப்பட்டதாக மத்திய சுகாதார அமைச்சகம் தெரிவித்துள்ளது. இவற்றில், 6% கோவிட் -19 க்கு “பாசிடிவ்” முடிவுகளைக் கொடுத்தன. “நெகடிவ்” முடிவுகளைப் பெற்ற 2,294 பேர் கோவிட்-19  அறிகுறிகளைக் கொண்டிருந்தனர். இந்த முடிவுகளை உறுதிப் படுத்த RT-PCR முறையைப் பயன்படுத்தி மீண்டும் சோதனை செய்யப்பட்டன. இந்த நோயாளிகளில் 15% பேருக்கு  வைரஸ் இருப்பது உறுதியானது.

113 மருத்துவமனைகளில் ஒவ்வொரு நாளும் கிட்டத்தட்ட 50,000 பேரை பரிசோதிக்கும் தமிழகம், ஆர்டி-பி.சி.ஆரை அதன் ஒரே கோவிட் -19 கண்டறியும் கருவியாக நம்புவதற்கு இந்த வேறுபாடு காரணமாகும். “எங்களுக்கு ஆர்டி-பி.சி.ஆர் கருவிகள் போதுமான எண்ணிக்கையில், சோதனையை நடத்துவதற்கான வசதிகள் உள்ளன. எனவே, நாங்கள் மிகவும் நம்பகமான சோதனையில் ஈடுபட முடிவு செய்தோம், ”என்று மாநில சுகாதார செயலாளர் ஜே.ராதாகிருஷ்ணன் கூறினார்.

அரசு நடத்தும் அனைத்து மருத்துவமனைகளுக்கும் மருந்துகள் மற்றும் உபகரணங்களை வாங்கும் தமிழ்நாடு மருத்துவ சேவைக் கழகத்தின் நிர்வாக இயக்குனர் டாக்டர் பி உமாநாத் கூறுகையில், ஆன்டிஜென் பரிசோதனைகள் உண்மையில் சோதனைகளைத் தாமதப்படுத்தலாம். ஏனெனில் தவறான “நெகடிவ்” முடிவுகள் “மிக அதிகமாக” உள்ளன. கோவிட் -19 “ஹாட்ஸ்பாட்” பட்டியலில் தாமதமாக நுழைந்த பெங்களூரு, ஜூலை 20 ஆம் தேதி விரைவான ஆன்டிஜென் சோதனைகளை நடத்தத் தொடங்கியது. கடந்த வெள்ளி வரை மொத்தம் 8,500 க்கும் மேற்பட்ட மாதிரிகள் சோதிக்கப்பட்டுள்ளன. ஆனால், பரிசோதனை முடிவுகளைப் பற்றிய எந்த பகுப்பாய்வும் இதுவரை செய்யப்படவில்லை. இருப்பினும் சுகாதார நிபுணர்களிடையே ஒருமித்த கருத்து இருந்தாலும், ஆன்டிஜென் சோதனை முடிவுகளை கோவிட் பரவலின் குறிகாட்டியாக கருத முடியாத நிலை உருவாகியுள்ளது.

“ஆர்டி-பி.சி.ஆருடன் ஒப்பிடும்போது விரைவான ஆன்டிஜென் சோதனைகள் குறைந்த உணர்திறனைக் கொண்டிருக்கின்றன என்றாலும், முடிவுகளை ஒரு மணி நேரத்திற்குள் நம்மால் பெற இயலும். அதனால்தான் இந்த சோதனைகள் முக்கியமாக ஸ்கிரீனிங் நோக்கங்களுக்காக பயன்படுத்தப்படுகின்றன,” என்று டெல்லியில் ஒரு சுகாதார அதிகாரி கூறினார். டெல்லி கடந்த புதன்கிழமை 24 மணி நேரத்தில் 14,810 விரைவான ஆன்டிஜென் சோதனைகளையும் 5,250 ஆர்டி-பிசிஆர் சோதனைகளையும் நடத்தியது குறிப்பிடத்தக்கது.

Thank you: Times of India