மீனவர் சுட்டுக்கொலை: இலங்கையை, இந்தியா பகிரங்கமாக எச்சரிக்க வேண்டும்: மு.க.ஸ்டாலின்

--

சென்னை,

மிழக மீனவர் சுட்டுக்கொல்லப்பட்டதற்கு தமிழக எதிர்க்கட்சி தலைவரும், திமுக  செயல் தலைவருமான ஸ்டாலின் கடும் கண்டனம் தெரிவித்து உள்ளார்.

மேலும், தமிழக மீனவர்கள் சுட்டுக்கொல்லப்படுவதை மத்திய அரசு வேடிக்கை பார்க்கக் கூடா இலங்கைக்கு பகிரங்கமாக இந்தியா எச்சரிக்கை விடுக்க வேண்டும் என்றும் வற்புறுத்தியுள்ளார்.

இதுகுறித்து அவர் வெளியிட்டுள்ள அறிக்கையில் கூறியிருப்பதாவது,

இந்திய கடல் எல்லையில் மீன்பிடித்துக் கொண்டிருந்த தமிழக மீனவர்கள் மீது இலங்கை கடற்படையினர் சரமாரியாக துப்பாக்கியால் சுட்டு, கையெறி குண்டுகளை வீசியதில் ராமேஸ்வரம் தங்கச்சிமடத்தை சேர்ந்த 21 வயதே ஆன பிரிட்ஜோ என்ற மீனவர் கழுத்தில் குண்டு பாய்ந்து சம்பவ இடத்திலேயே உயிரிழந்திருப்பதும், மேலும் பல மீனவர்கள் காயமடைந்திருப்பதும் பேரதிர்ச்சியை ஏற்படுத்தியுள்ளது.

தமிழக மீனவர்கள் பிரச்சினையில் மத்திய- மாநில அரசுகள் தொடர்ந்து அலட்சியமாகவே இருந்து வருகிறது. இரு நாட்டு மீனவர்களுக்கு இடையில் நடைபெற்ற பேச்சுவார்த்தைகளின் அடிப்படையில் எடுக்கப்பட்ட முடிவுகளை இலங்கை அரசு தீர்மானமாக உதாசீனப்படுத்தி வருவது இதன்மூலம் தெரியவந்துள்ளது.

இலங்கை கடற்படையினரின் இந்த கொடூரத் தாக்குதல் ராமநாதபுரம் பகுதி மீனவ கிராமங்களில் மட்டுமின்றி அனைத்துப் பகுதிகளிலும் உள்ள தமிழக மீனவர்கள் மத்தியிலும் கடும் பதற்றத்தை உருவாக்கியிருக்கிறது.

மீனவர்கள் கைது, படகுகள் பறிமுதல் என்று அராஜக நடவடிக்கைகளில் ஈடுபட்டு வந்த இலங்கை ராணுவம் இப்போது மீனவர்களை சுட்டுக் கொல்வது என்று முடிவு எடுத்து செயல்படுவதை மத்திய அரசு இனிமேலும் ஒரு நிமிடம் கூட வேடிக்கை பார்க்கக் கூடாது.

இலங்கை அரசை தூதரக ரீதியாக தொடர்பு கொண்டோ அல்லது இந்தியாவிற்கான இலங்கை தூதரை நேரில் அழைத்தோ இலங்கை அரசுக்கு இந்தியா பகிரங்க எச்சரிக்கை விடுக்க வேண்டும். மேலும் சுட்டுக் கொல்லப்பட்ட மீனவர் குடும்பத்திற்கு உடனடியாக 25 லட்சம் ரூபாய் நிதியளித்து, படுகாயமடைந்த மீனவர்களுக்கும் உயர்தர சிகிச்சை அளித்து காப்பாற்ற அரசு உடனடியாக நடவடிக்கை எடுக்க வேண்டும்.

இவ்வாறு அவர் கூறியுள்ளார்.

You may have missed