குறைந்து வரும் கொரோனா தொற்று: சென்னை அரசு மருத்துவமனைகளில் வழக்கமான சிகிச்சைகள் மீண்டும் தொடக்கம்

சென்னை: தமிழகத்தில் தினசரி கொரோனா நோயாளிகளின் எண்ணிக்கை குறைந்து வருவதால் மருத்துவமனைகளில் வழக்கமான மருத்துவசேவைகள் மீண்டும் தொடங்கி உள்ளன.

சென்னையில் நகரம் முழுவதும் அரசு மருத்துவமனைகளில் வழக்கமான மருத்துவ சேவைகள் இயல்பு நிலைக்கு திரும்பி உள்ளன. இது குறித்து ராஜீவ் காந்தி அரசு பொது மருத்துவமனை முதல்வர் தேரனிராஜன் கூறி இருப்பதாவது:

ராஜீவ் காந்தி அரசு பொது மருத்துவமனையில் ஒவ்வொரு நாளும் சராசரியாக 7,000 பேர் வெளிநோயாளிகளாக வருகிறார்கள். ஆனால் கொரோனாவுக்கு முன்பு, இந்த எண்ணிக்கை 10,000 முதல் 15,000 வரையாக இருந்தது. இந்த மருத்துவமனையில் 1,500 முதல் 1,800 உள் நோயாளிகள் உள்ளனர்.

அறுவை சிகிச்சை, நீரிழிவு நோய்,  நரம்பியல் மற்றும் இரைப்பை குடல் போன்ற அனைத்து நோயாளிகளின் வார்டுகளும் நிரம்பியுள்ளன. கொரோனா தொற்றின் உச்சத்தின் போது, ​​சராசரியாக 200 முதல் 350 நோயாளிகள் இருந்தனர். நாங்கள் இப்போது ஒரு நாளைக்கு கிட்டத்தட்ட 50 தேர்ந்தெடுக்கப்பட்ட அறுவை சிகிச்சைகளை செய்து வருகிறோம், மேலும் உறுப்பு மாற்று நடைமுறைகளை மீண்டும் தொடங்க தயாராகி வருகிறோம்.

நாங்கள் பார்த்த அதிகபட்ச கொரோனா நோயாளிகளின் எண்ணிக்கை 1,083 ஆகும். இன்று, எங்களிடம் 54 கொரோனா நோயாளிகளும் 123 பேர் சந்தேக அறிகுறிகளுடன் உள்ளனர். ஆஞ்சியோபிளாஸ்டிக் உள்ளிட்ட சிகிச்சைகளும் தொடங்கி உள்ளன. அதே நேரத்தில் கொரோனா மற்றும் வழக்கமான நோயாளிகளுக்கு டயாலிசிஸ் தொடர்ந்து நடக்கிறது. கொரோனா அல்லாத சேவைகளுக்கு வரும் நோயாளிகளின் எண்ணிக்கை அதிகரித்துள்ளது என்றார்.

ஸ்டான்லி மருத்துவமனை இயக்குநர் பாலாஜி கூறியிருப்பதாவது: ஸ்டான்லி மருத்துவக் கல்லூரி மருத்துவமனையில் கொரோனா காலம் முழுவதும் அனைத்து அவசர மருத்துவ மற்றும் அறுவை சிகிச்சை சேவைகளும் தொடர்ந்தன. கொரோனா அல்லாத வெளிநோயாளிகள் சேவைகளை பொறுத்தவரை, இந்த எண்ணிக்கை செப்டம்பர் முதல் ஒரு நாளைக்கு 1,250 ஆக அதிகரித்து தற்போது 4,500 ஆக உயர்ந்துள்ளது.

ஏப்ரல், மே மற்றும் ஜூன் மாத தொடக்கத்தில் சில தேர்ந்தெடுக்கப்பட்ட அறுவை சிகிச்சைகள் நிறுத்தப்பட்டன. பல நோயாளிகள் தேர்ந்தெடுக்கப்பட்ட அறுவை சிகிச்சைகளுக்காக காத்திருந்ததோடு, பெரும்பாலான மருத்துவமனைகள் அந்த சிகிச்சைகளை தவிர்த்ததால், ஜூலை மாதத்திலேயே நாங்கள் மீண்டும் தொடங்கினோம் என்றார்.

கீழ்ப்பாக்கம் மருத்துவக்கல்லூரி இயக்குநர் வசந்தமணி கூறி இருப்பதாவது: கொரோனாவுக்கு முன்பு, எங்களின் வெளிநோயாளிகளின் எண்ணிக்கை 3,500 முதல் 4,500 வரை இருந்தது. இப்போது, ​​நாங்கள் 2,500 முதல் 3,000 வெளிநோயாளிகளை பெறுகிறோம். பிரசவம், குழந்தை சிகிச்சை மற்றும் அவசர சிகிக்சைகளுக்காக பலர் அனுமதிக்கப்பட்டு வருவதால் படுக்கை வசதி 85% நிரம்பியே உள்ளது என்று கூறினார்.