ஹூண்டாய் நிர்வாக இயக்குநருடன் முதல்வர் எடப்பாடி பழனிச்சாமி சந்திப்பு – ரூ.7000 கோடிக்கு தொழிற்சாலை தொடங்க ஒப்பந்தம்!!

ஹூண்டாய் நிறுவனத்துடன் ரூ.7000 கோடிக்கு தொழிற்சாலை தொடங்க தமிழக முதலமைச்சர் எடப்பாடி பழனிச்சாமி ஒப்பந்தம் செய்ய திட்டமிட்டுள்ளார்.

hyundai

ஹுண்டாய் நிறுவனம் சுமார் ரூ.7000 கோடி செலவில் தமிழகத்தில் மின்சக்தியால் இயங்கும் கார்களை உற்பத்தி செய்யும் தொழிற்சாலையை தொடங்க உள்ளது. இதன் காரணமாக ஹுண்டாய் நிறுவனத்தின் நிர்வாக இயக்குநரான ஹீ மற்றும் இந்தியத் துணைத்தலைவர் தத்தா ஆகிய இருவரும், சென்னையில் உள்ள தலைமைச் செயலகத்தில் தமிழக முதல்வர் எடப்பாடி பழனிச்சாமியை சந்தித்தனர்.

இந்தச் சந்திப்பிற்குப் பிறகு செய்தியாளர்களைச் சந்தித்த துணைத்தலைவர் தத்தா, ” சுமார் ரூ.7000 கோடி செலவில் மின்சக்தியால் இயங்கும் கார்களை உற்பத்தி செய்யும் தொழிற்சாலை தமிழகத்தில் நிறுவப்பட உள்ளது “ என தெரிவித்தார்.

இதற்கான ஒப்பந்தம் வரும் ஜனவரி மாதம் நடைபெறும் உலக முதலீட்டாளர்கள் மாநாட்டில் போடப்படும் எனவும், இதன் மூலம் 700 பேருக்கு வேலை வாய்ப்புக் கிடைக்கும் என்றும் தெரிவிக்கப்பட்டது. முன்னதாக, சென்னையில் உலக முதலீட்டாளர்கள் மாநாடு நடத்துவதற்காக ஹுண்டாய் நிறுவனம் சார்பில் தமிழக அரசுக்குப் பாராட்டுகள் தெரிவிக்கப்பட்டது குறிப்பிடத்தக்கது.