#MeToo: சின்மயி முறைப்படி புகார் அளித்தால் காவல்துறை நடவடிக்கை எடுக்கும் – அமைச்சர் மாஃபா பாண்டியராஜன்

பாடலாசிரியர் வைரமுத்து மீது பாலியல் குற்றச்சாட்டுகளை கூறி வரும் சின்மயி, முறைப்படி புகார் அளித்தால் காவல்துறை நடவடிக்கை எடுக்கும் என அமைச்சர் மாஃபா பாண்டியராஜன் தெரிவித்துள்ளார்.

ma

உலகம் முழுவதும் உள்ள பெண்கள் தங்களுக்கு ஏற்பட்டுள்ள பாலியல் துன்புறுத்தல்கள் மற்றும் தொல்லைகள் பற்றி #MeToo என்ற ஹேஸ்டேக்கில், ட்விட்டரில் பதிவிட்டு வருகின்றனர். இந்தியாவிலும் இந்தக் குற்றச்சாட்டுகள் சமீப காலமாக பெருகி உள்ளன.

பாலிவுட் நடிகையான தானுஸ்ரீ தத்தா பிரபல நடிகரான நானா பட்நேகர், தன்னை பாலியல் ரீதியாக துன்புறுத்தியதாக குற்றம் சுமத்தினார். அவரைத் தொடர்ந்து, கங்கனா ரனாவத் உள்ளிட்ட முன்னணி நடிகைகளும் அவருக்கு ஆதரவாக, தங்களுக்கு ஏற்பட்ட பாலியல் தொல்லைகள் பற்றி விவரித்தனர்.

அந்த வகையில், பிரபல பின்னணி பாடகியான சின்மயி தமிழ் சினிமாவின் மூத்த பாடலாசிரியரான வைரமுத்து மீது பாலியல் புகார்களை சுமத்தினார். இது சினிமா வட்டாரத்திலும் அரசியல் வட்டாரங்களிலும் சலசலப்பை ஏற்படுத்தியது.

சின்மயின் குற்றச்சாட்டைத் தொடர்ந்து, நடிகை சமந்தா, ஸ்ரீ ரெட்டி, நடிகர் கமல்ஹாசன், சித்தார்த், தமிழக பாஜக தலைவர் தமிழிசை சௌந்தர்ராஜன் உள்ளிட்டோர் சின்மயிக்கு ஆதரவாக கருத்து தெரிவித்தனர். மேலும், வைரமுத்து மீது நடவடிக்கை எடுக்க வேண்டும் என்றும் கூறினர்.

#MeToo விவகாரம் தீவிரமடைவதைத் தொடர்ந்து, #MeToo என்ற ஹேஷ்டேக்கின் கீழ் சமூகவலைத் தளங்களில் கூறப்படும் பாலியல் புகார்களை விசாரிக்க 4 முன்னாள் நீதிபதிகள் அடங்கிய குழு ஒன்று அமைக்கப்பட உள்ளதாக மத்திய அமைச்சர் மேனகா காந்தி தெரிவித்தார்.

இந்நிலையில், இந்த விவகாரம் குறித்து பேட்டியளித்த தமிழக அமைச்சர் மாஃபா.பாண்டியராஜன், “மீ டூ தமிழகத்திற்கு மிகவும் தாமதமாக வந்துள்ளது. பாடகி சின்மயி புகார் அளித்தால், அதற்கு என்ன நடவடிக்கை எடுக்க வேண்டுமோ அதை காவல்துறை எடுக்கும்,” என தெரிவித்துள்ளார்.