காதல் கவிதைகள் – தொகுப்பு 6
பா. தேவிமயில் குமார் கவிதைகள்
இரட்டிப்பு
உன்னுடன்
இன்று வரை
சொல்ல முடியாதக்
கவிதைகள் எல்லாம்
காதலாகக்
கனத்துவிட்டது
இதயத்தில் !
இரட்டிப்பாகவே !
என்னுள் நீ, என்றும்
இருப்பதால்
உன் வலிகளையும்,
என் வலிகளாகவே
எண்ணி அனுபவிக்கிறேன் !
தலையாட்டி
திருமணத்திற்குப் பின்
ஒருநாள்
நானும் ஒரு பெண்ணும் என
நிதானமாக ஆரம்பித்தாய்,
காதலித்தோம்,
கதை பேசினோம்,
காற்றில் பறந்தோம்,
கசந்தது காதலென்றும்,
காதல் அரக்கன், அவள் அப்பனென்றும்,
உன் காதலைப் பேசினாய் !
பேசிய பின், மெதுவாக
நீ, காதலித்திருக்கிறாயா ? என
நிதர்சனமாய்க் கேட்டாய் !
“இல்லையென”
மௌனமாகத் தலையாட்டினாள்,
மௌனம் கலையாதப் புதுப்பெண் !
உன் முகம் ஒளிர்ந்ததை
அவள் பார்த்தபின்
எண்ணினாள்,
இது தான் நீ எதிர்பார்த்த
பதிலென்று ! ஆண் சொல்லலாம்
பெண் சொன்னால்….??
கதைகள்
நம்மைப் பற்றிய
கதைகள்
நாளுக்கு நாள்
கூடிக்கொண்டேப் போகிறது !
ஆனால் நீயோ
இன்றாவது,
இப்போதாவது
சொல்வாய் என
செவி சாய்க்கிறேன் !
வழக்கம் போல
வருகிறேன் என
சொல்லிவிட்டு
செல்கிறாயே !
நாளையாவது
சொல்லிவிடேன்
நாம் “காதலர்களென”
நானாவது
தெரிந்துகொள்கிறேன்
குறைந்தபட்சம்
நம் உறவு எதுவென ?
சொல்லிவிடேன்,
முழுமை
மூன்றாம் பாலினத்தின்
முழுமையானக்
காதல் வலிகளையும்
கன்னி(ண்ணி)ய உணர்வுகளையும்
கதையிலும், கவிதையிலும்,
பதிவு செய்தால்
மட்டுமே, நம் இலக்கியம்
முழுமைபெறும் தோழர்களே !
காதலின் மரணம்
உன்னைப் பார்ப்பதற்கு
முன்னாலே
அவளை(னை)ப் பார்த்திருந்தால்
அவ(ளோ)னோடு தான்
என் வாழ்க்கை,
அமைந்திருக்கும் என்று சொல்லும்
அந்த நொடியிலேயே
கேட்பவரின்
காதல் மரணிக்கிறது !
குடை
ஓயாமல் பெய்திடும்
அந்த மழையில்
உனக்கும், எனக்குமாய்
ஒரு குடை மட்டுமேக்
கிடைத்தது !
அட,
அதுவும் விரிய மறுக்கிறதே !
அதற்குத் தெரியும்,
இந்த முதல் மழை
இப்பொழுது நமக்கானதென !
கைப்பையினுள்
குடையை வைத்துவிடு !
கதகதப்பாய் அது
கண்மூடி உறங்கட்டுமே !
ஆனால்…..
நாம் நனைந்திடலாம் வா !
அனுமதி
கடவுளைக் காதலிக்க
கடவுச்சீட்டு கொடுத்த சமூகம்,
மனிதர்களுக்கு
மறுப்பு சொல்வதேன் ?
காதலிக்கும் எல்லோருக்கும்,
காதலிக்க
கடவுள் கிடைப்பதில்லையே !
தவிப்பு
காதல் வேண்டாமென்றாய்,
சரி என்றேன் !
நண்பர்களாக மட்டுமாவது
நாமிருக்கலாம் என்றேன் !
நட்புடன் மறுத்தாய் !
நீ சொல்வது சரிதான்,
காதலுக்குப் பிறகான
உறவுகள், உறக்கமில்லாத
கவலைகளைத் தரும் !
கை கூப்பி கேட்கிறேன்
கொன்று விடாதே, காதலே !
சென்றுவிடு, மீண்டும் வராதே !
கடவுள் பாவம்
கடவுள் எப்போதுமேக்
காதலிடம் தோற்றுக்
கொண்டே, இருக்கிறார் !
கடவுளை விட மனிதர்கள்
காதலையே அதிகம்
கொண்டாடுகிறார்களாம்
கடவுள் பாவம்தானே ?
ஈவா ஹிட்லர்
மனித வேட்டையாடியவனின்
மனதை வேட்டையாடினாய் !
வேண்டியதெல்லாம் வென்றவன்,
வேண்டி நின்றான் உன் காதலை !
கொடூரனின் மனப்பக்கங்களில்
காதலைப் படித்தவள் நீ !
நரகம் தான் எனத் தெரிந்தும், காதலின்
நரபலிக்காக நீயே சென்றாய் !
கடைசி நொடியில்கூட, காதலனின்
கைப்பிடிக்க காதலுடன் நின்றாய் !
உன் காதலனை என்றென்றும் இந்த
உலகம் ஏசிக்கொண்டே இருக்கும் !
ஆனால்……. ஈவா,
உலகம் உன்னை மட்டும்,
இன்றல்ல, என்றென்றும் சொல்லிடும்
“காதல் தேவதை” என்றே !
– பா. தேவிமயில் குமார்