Random image

மடியாசனம் – மழலையர்க் கவிதைகள் தொகுப்பு 2

 

மடியாசனம் – மழலையர்க் கவிதைகள்

தொகுப்பு 2

பா. தேவிமயில் குமார்

 

தாலாட்டு

 

ஆண்டவனுக்கு

அசதியாக

இருந்ததால்

குழந்தையைத்

தூங்க வைத்துத்

துணைக்கு அவனும்

தூங்குகிறான் !

 

கல் பெண்ணாக…….

 

காயப்படுத்தியக்

கல்லைக்

காலால் உதைத்தது

குழந்தை, சற்று

பயமாகத்தான்

பார்த்தேன்,

எங்கே கல்

எழுந்து விடுமோ ?

பெண் உருப்பெற்று ? என்று

 

வன்கொடுமை

 

விலங்குகளிடம்

விளையாடும்

பாப்பா,

பாதுகாப்பாகவே

இருக்கிறது !

சில மனித

மிருகங்களிடம்தான்

சித்ரவதைபடுகிறது !

 

வானவில்

 

வெள்ளை

வானவில்லுக்கு

வண்ணம்

தீட்டியது குழந்தை !

உபயம்,

சுண்ணாம்பு சுவர் !

 

வேடம்

 

மாறுவேடப் போட்டியில்

மாறி, மாறி

வேடங்களுடன்

வந்த குழந்தைகளுக்கு,

ஒரு சந்தேகம் !

எல்லா வேடமும்

இங்கிருக்கிறது !

ஆனால்……

ஏன் ???

குழந்தை வேடம்

யாரும் போடவில்லை ?? என

 

பிரம்மனே ……

 

படைப்புத்

தொழிலின் போது

தூங்கிவிட்டாயா ?

மாற்றுத்திறனாளி

மழலைகளைக்

காண்கையில்

கண்களில்

கரை புரள்கிறது !

கண்ணீர் ….

 

சிற்பி

 

மண் பூசி நின்ற

மழலையைப்

பார்த்துதான்

பூமியின் முதல்

சிற்பத்தினை

செதுக்கியிருப்பான்

முதல் சிற்பி !

 

இணைப்பு …..

 

குழந்தையை

பூமிக்கு அனுப்பிய

கடவுள்……

இலவச இணைப்பாகப்

பூக்களையும்

அனுப்பிவிட்டான் !

 

பயம்

 

மூன்று வயதில் தன்

முதல் பயத்தை

பதிவு செய்கிறது

பாப்பா…..

பள்ளிக்கூடத்தைப்

பார்த்து !

 

அதிகாரம்

 

தன் வாழ்நாள்

அதிகாரத்தை

அப்படியே

அள்ளிக்கொடுத்தான்

ஒரு ஆண்மகன்…….

ஒருத்தியிடம்….

ஆம்……

அன்று

அவனுக்குப்

பெண் குழந்தைப்

பிறந்த தினம் !