கபினியில் இருந்து நீர்வரத்து குறைவு

தர்மபுரி: கர்நாடகாவில்  கபினி அணைக்கட்டிலிருந்து வரும் நீர் வரத்து  குறைந்துள்ளது.

காவிரி நீர்ப்பிடிப்புப் பகுதிகளில் பெய்த கனமழையால், கபினி, கிருஷ்ணராஜ சாகர் அணைகள் நிரம்பின. இதையடுத்து கபினி அணையில் இருந்து வினாடிக்கு 35,000 கன அடி நீர் காவிரியில் திறந்து விடப்பட்டது.

இதனால் தமிழக எல்லைப் பகுதியான பிலிகுண்டுலு வழியாக நேற்று அதிகாலை வினாடிக்கு 25,000 கன அடி நீர் வந்தது. பின்னர் படிப்படியாக அதிகரித்து, நேற்று மாலை வினாடிக்கு 30,000 கன அடியாக உயர்ந்தது.

இதுகுறித்து ஆய்வு செய்ய மத்திய நீர்வளத்துறை அதிகாரிகள், ஒரு மணி நேரத்திற்கு ஒரு முறை பரிசலில் சென்று அளவீடு செய்து வருகிறார்கள்.

காவிரி ஆற்றில் நீர்வரத்து அதிகரித்துள்ளதால், மெயின் அருவி, சினி பால்ஸ், ஐந்தருவி மற்றும் புதிய அருவிகளில் வெள்ளப் பெருக்கு ஏற்பட்டுள்ளது. இதனால் சுற்றுலா பயணிகளுக்கு தடை விதிக்கப்பட்டுள்ளது.

அருவிகளில் குளிக்கவும், பரிசல்கள் இயக்கவும் தடை செய்யப்பட்டுள்ளது. ஒகேனக்கலில் இருந்து வரும் தண்ணீர், மேட்டூர் அணையை அடைந்தது. நேற்று மாலை அணைக்கு நீர்வரத்து 19,087 கன அடியாக இருந்தது.

இதற்கிடையில் காவிரி நீர்பிடிப்புப் பகுதிகளில் மழை அளவு குறைந்தது. இதன் காரணமாக அணைகளில் நீர்மட்டம் குறைந்து, நீர் திறப்பும் வினாடிக்கு 5,000 கன அடியாக குறைக்கப்பட்டு இருக்கிறது.