மும்பை:
மகாராஷ்டிராவில், திரைப்படங்கள், டிவி சீரியல்கள் படப்பிடிப்புக்கு மாநில அரசு அனுமதி அளித்துள்ளது. அத்துடன் பல்வேறு கட்டுப்பாடுகளும் விதிக்கப்பட்டு உள்ளது.
இந்தியாவிலேயே கொரோனா பாதிப்பில் முதலிடத்தில் உள்ளது மகாராஷ்டிரா மாநிலம். இங்கு 67,655 பேர் கொரோனாவால் பாதிக்கப்பட்டுள்ளனர். அங்கு இதுவரை 2,286 பேர் உயிரிழந்துள்ளனர். 29,329 பேர் குணமடைந்து வீடு திரும்பியுள்ள்ளனர்.
கொரோனா தடுப்பு ஊரடங்கு 5வதுமுறையாக ஜூன் 30ந்தேதி வரை நாடு முழுவதும் நீட்டிக்கப்பட்டுள்ள நிலையில், மத்திய, மாநில அரசுகள் பல்வேறு தளர்வுகளையும் அறிவித்து வருகின்றன.
இதன் வாயிலாக, கொரோனாவால் முடக்கப்பட்டிருந்த சினிமா உலகம் மற்றும் சின்னத்திரை உலகினர் மீண்டும் படப்பிடிப்பை தொடங்க தமிழகம் உள்பட பல மாநில அரசுகள் அனுமதி வழங்கி உள்ளன.
இந்த நிலையில், மகாராஷ்டிரா மாநிலத்திலும் சினிமா படப்பிடிப்புகள் , சின்னத்திரை படப்பிடிப்புகள் நடத்த மாநில அரசு கட்டுப்பாடுகளுடன் அனுமதி வழங்கி உள்ளது.
அதன்படி, படப்பிடிப்பில் கலந்துகொள்ளும் அனைவரும் தெர்மல் ஸ்கேனிங் செய்யப்பட்டப் பிறகே அனுமதிக்கப் பட வேண்டும், ச65 வயதிற்கு மேற்பட்டவர்கள் படப்பிடிப்பில் கலந்துகொள்ளக் கூடாது, கர்ப்பிணிப் பெண்கள் மற்றும் குழந்தைகள் விலகி இருக்க வேண்டும், படக்காட்சிகளி முத்தங்கள், ஹேண்ட்ஷேக்குகள் அல்லது அரவணைப்புகள் போன்றவை இருக்கக்கூடாது, படப்பிடிப்பு தளங்களில் டாக்டர்கள், ஆம்புலன்ஸ்கள் தயாராக இருக்க வேண்டும், என்பன உள்பட பல கட்டுப்பாடுகள் அறிவிக்கப்பட்டு உள்ளன.
