நவம்பர் 26: மத்தியஅரசின் மக்கள் விரோத நடவடிக்கைக்கு எதிராக இன்று நாடு தழுவிய போராட்டம்…

டெல்லி: மத்தியஅரசின் நடவடிக்கைக்கு எதிராக இன்று நாடு தழுவிய போராட்டம் நடைபெறும் என அறிவிக்கப்பட்ட நிலையில், தமிழகத்தில் புயல் மழையால் பாதிக்கப்பட்ட இடங்களை தவிர மற்றப் பகுதிகளில் இன்று வேலைநிறுத்த போராட்டம் நடைபெறும் என அறிவிக்கப்பட்டு உள்ளது.

மத்திய வர்த்தக அமைப்புகளின் கூட்டு கூட்டத்தில் எடுக்கப்பட்ட முடிவின்படி, மோடி அரசுக்கு எதிராக இன்று (நவம்பர் 26) நாடு தழுவிய பொது வேலைநிறுத்த போராட்டத்தில் ஈடுபடுவது என முடிவு செய்யப்பட்டது. அதன்படி இன்று போராட்டம் நடைபெறுகிறது. இதில் சுமார் 25 கோடி தொழிலாளர்கள் கலந்துகொள்வார்கள் என்று தெரிகிறது.

மத்தியஅரசு கொண்டு வந்துள்ள விவசாயிகளுக்கு எதிரான மசோதாக்களை வாபஸ் பெறவேணடும், நிதி துறை உள்ளிட்ட பொது துறைகளை தனியார் மயம் ஆக்குவது நிறுத்தப்பட வேண்டும். அரசால் நடத்தப்படும் உற்பத்தி மற்றும் சேவை சார்ந்த ரெயில்வே, தொழிற்சாலைகள், துறைமுகங்கள் போன்றவற்றை கார்ப்பரேட்மயம் ஆக்குவதும் நிறுத்தப்பட வேண்டும்.அரசு மற்றும் பொது துறை அமைப்புகளின் ஊழியர்களை கட்டாயத்தின்பேரில் முன்பே அவர்களை ஓய்வு பெற சுற்றறிக்கை அனுப்புவது வாபஸ் பெறப்பட வேண்டும் என்பன உள்ளிட்ட பல்வேறு கோரிக்கைகளை  வலியுறுத்தி இன்று நாடு தழுவிய போராட்டம் நடைபெறுகிறது.

இந்த போராட்டத்தில் இந்திய தேசிய வர்த்தக யூனியன் காங்கிரஸ், அகில இந்திய வர்த்தக யூனியன் காங்கிரஸ், இந்திய மத்திய வர்த்தக யூனியன்கள், அகில இந்திய யுனைடெட் வர்த்தக யூனியன் மையம், வர்த்தக யூனியன் ஒருங்கிணைப்பு மையம் உள்ளிட்ட 10 வர்த்தக அமைப்புகள் கலந்து கொள்கின்றன. மேலும, அனைத்து இந்திய மின் துறை ஊழியர்களும் போராட்டத்தில் ஈடுபட முடிவு செய்துள்ளனர். பல மாநிலங்களில் ஆட்டோ மற்றும் டாக்சி ஓட்டுனர்களும் போராட்டத்தில் கலந்து கொள்கின்றனர்

.இதற்காக மத்திய வர்த்தக அமைப்புகள் போஸ்டர்கள், துண்டு பிரசுரங்கள் உள்ளிட்டவற்றை கொண்டு தனிப்பட்ட மற்றும் மாநில அமைப்புகளுடன் இணைந்து வினியோகித்துள்ளன. இந்த நாடு தழுவிய பொது வேலைநிறுத்த போராட்டத்தில் மத்திய மற்றும் மாநில அமைப்புகளை சேர்ந்த 25 கோடி தொழிலாளர்கள் ஈடுபடுவார்கள் என எதிர்பார்க்கப்படுகிறது.