அக்டோபர் 11: கே.பி. சுந்தராம்பாள் பிறந்ததினம்

க்டோபர் 11: ‘வெங்கலக் குரல் பாடகி’ கே. பி. சுந்தராம்பாள் பிறந்த தினம் இன்று.

கே. பி. சுந்தராம்பாள் என அறியப்படும் கொடுமுடி பாலாம்பாள் சுந்தராம்பாள் (அக்டோபர் 10, 1908- பிறந்த தினம் இன்று

தமிழிசை, நாடகம், அரசியல், திரைப்படம், ஆன்மிகம் எனப் பலதுறைகளிலும் புகழ் ஈட்டியவர். இவர் கொடுமுடி கோகிலம் என்றும் அழைக்கப்பட்டார்.. அறிஞர் அண்ணா இவரை கொடுமுடி கோகிலம் என்று புகழ்ந்தார்.

ஈரோடு மாவட்டத்திலுள்ள கொடுமுடியில் பாலாம்பாள் என்ற அம்மையாருக்கு சுந்தராம்பாள் பிறந்தார். இவருக்கு கனகசபாபதி, சுப்பம்மாள் என்ற இரண்டு சகோதரர்கள். இளம்வயதிலேயே தந்தையை இழந்தவர், தனது சகோதரர்களின் ஆதரவால், குடும்பத்தை நடத்தி வந்தார் தாயார். ‘கொடுமுடி லண்டன் மிஷன் பள்ளி’யில் கல்வி கற்றார் சுந்தராம்பாள்.

வேலுநாயர் – ராஜாமணி அம்மாள் நாடகக் குழுவினர் நல்லதங்காள் நாடகம் நடத்த கரூருக்கு வந்திருந்தனர். அந்த நாடகத்தில் நல்லதங்காளின் மூத்த பிள்ளையான ஞானசேகரன் வேடத்தை சுந்தராம்பாள் ஏற்று ஆண் வேடத்தில் நடித்தார். பசிக்குதே! வயிறு பசிக்குதே என்ற பாட்டை மிக அருமையாகப் பாடி ரசிகர்களிடன் ஏகோபித்த பாராட்டைப் பெற்றார். தொடர்ந்து நாடகங்களில் நடிக்கத் தொடங்கினார். சொந்தக் குரலிலேயே பாடி நடித்தார்.

1917−ல் கொழும்பு சென்று நடிக்கத் தொடங்கினார். இலங்கையின் பல ஊர்களிலும் இவர் நடித்த நாடகம் நடைபெற்றது. 1929களில் நாடு திரும்பினார். வள்ளி திருமணம், நல்லதங்காள், கோவலன், ஞானசெளந்தரி, பவளக்கொடி போன்ற அக்காலத்தில் புகழ்பெற்ற நாடகங்களில் நடித்தார்.

மீண்டும் கே.பி.எஸ். 1926−ல் கொழும்புக்கு நாடகக் குழுவுடன் சென்றார். கே.பி.எஸ் புகழ் பரவலாக வளர்ந்தி ருந்தது. அக்காலத்தில் எஸ். ஜி. கிட்டப்பா தனது குரல் வளத்தால் நடிப்பால் பலரது கவனத்தைப் பெற்று புகழுடன் இருந்து வந்தார். கொழும்பில் கேபிஎஸ் உடன் இணைந்து கிட்டப்பா நடிக்க ஆரம்பித்தார்.

1926ஆம் ஆண்டு சுந்தராம்பாள் – கிட்டப்பா நடித்த வள்ளிதிருமணம் அரங்கேறியது. இருவரும் பின்னர் திருமணம் புரிந்து கொண்டனர்.

1933−ல் டிசம்பர் 2இல் கிட்டப்பா காலமானார். அப்போது அவருக்கு வயது 28. சுந்தராம்பாளுக்கு வயது 25. அன்றிலிருந்து அவர் வெள்ளை சேலைக் கட்டத்தொடங்கினார். எந்தவொரு ஆண் நடிகருடனும் ஜோடி சேர்ந்து நடிப்பதில்லை என சபதம் மேற்கொண்டார். அதைக் கடைசி வரை காப்பாற்றி வந்தார்.

நீண்டகாலமாக பொதுவாழ்க்கையில் இருந்து ஒதுங்கி இருந்த கேபிஎஸ் 1934−ல் நந்தனார் நாடகத்தில் நடித்தார். தொடர்ந்து பல நாடகங்களை நடத்தி வந்தார். அவைகளில் பெரும்பாலும் அவர் ஆண் வேடம் தரித்து பெண் வேடத்துக்கு வேறு பெண் நடிகர்களை அமர்த்தியிருந்தார்.

பக்த நந்தனார் என்னும் படத்தில் நந்தனார் வேடம் பூண்டு நடித்தார். பக்த நந்தனாரில் மொத்தம் 41 பாடல்கள். இவற்றில் கேபிஸ் பாடியவை 19 பாடல்கள். 1935இல் இப்படம் வெளிவந்தது. அடுத்ததாக மணிமேகலையில் நடித்தார். 1938−ல் படப்பிடிப்பு ஆரம்பிக்கப்பட்டு 1940−ல் படம் வெளிவந்தது. இப்படத்தில் 11 பாடல்களை இவர் பாடியிருந்தார்.

தமிழிசை முதல் மாநாட்டு இசையரங்கில் (ஜனவரி 4, 1944) கலந்து கொண்டார். தொடர்ந்து கேபிஎஸ் ஔவையார் என்ற படத்தில் ஔவையார் வேடமேற்று நடித்தார். இப்படம் 1953−ல் வெளிவந்தது.

‘பொறுமை யென்னும் நகையணிந்து’ , ‘கன்னித் தமிழ்நாட்டிலே – வெண்ணிலவே’ போன்ற பாடல்கள் பிரசித்தமானவை. ஒளவையார் படத்தில் 48 பாடல்கள். இவற்றில் கேபிஎஸ் பாடியவை 30.
1964 பூம்புகார் படம் வெளிவந்தது. இப்படத்தில் கவுந்தி அடிகள் பாத்திரத்தை கேபிஎஸ் ஏற்று நடித்திருந்தார்.
மகாகவி காளிதாஸ் (1966), திருவிளையாடல் (1965), கந்தன் கருணை (1967), உயிர் மேல் ஆசை] (1967), துணைவன் (1969), சக்தி லீலை (1972), காரைக்கால் அம்மையார் (1973), திருமலை தெய்வம் (1973) உள்ளிட்ட 12 படங்களில் கேபிஎஸ் பாடி நடித்தார்.

காங்கிரஸ் மீது பற்றுகொண்டு கேபிஎஸ், காங்கிரஸ் பிரச்சாரங்களில்  தவறாது ஈடுபட்டு வந்தார். கதர் இயக்கம், தீண்டாமை ஒழிப்பு, வெள்ளை ஏகாதிபத்திய எதிர்ப்பு ஆகிய பாடல்களையும் பாடி வந்தார்.
காமராசர் ஆட்சியின் போது தமிழக மேல் சபை உறுப்பினராக பதவி வகித்தார்.

கே.பி.எஸ். ஆல் கட்டப்பட்டு எம்.ஜி.ஆரால் திறந்து வைக்கப்பட்ட கே.பி.எஸ். திரையரங்கம் இன்றும் இவரின் உறவினர்களால் கொடுமுடியில் நிர்வகித்து வரப்படுகிறது. கே.பி.எஸ். போலவே டி.ஆர்.ராஜகுமாரி, சிவாஜி, நாகேஷ் ஆகியோரும் திரையரங்க உரிமையாளர்கள் என்பதை இங்கு நினைவு கொள்வோம்.

துணைவன் படத்தில் பாடியதற்காக 1969 ஆம் ஆண்டின் சிறந்த பின்னணிப் பாடகி விருதை மத்திய அரசு இவருக்கு அளித்தது. ஏழிசை வல்லபி என்று போற்றப்பட்டவர் இவர்.

தமிழக அரசின் மேல் சபையில் எம்.எல்.சி. பதவியும் வகித்தார். தீரர் சத்தியமூர்த்தியை கே.பி.எஸ். தன் உடன்பிறவா அண்ணாராக மதித்துவந்தார். தீரர் வாடகை வீட்டிலிருந்த நிலையைக் கண்டு வருந்தினார்

கே.பி.எஸ். அதனால் சென்னை தியாகராய நகர் இந்தி பிரச்சார சபாவுக்கு முன்புறம் இருந்த தனது நாலரை கிரவுண்ட் மனையை தீரர் பெயரில் எழுதி வைத்தார் கே.பி.எஸ். ஒளவையார் படம் பார்த்தவுடன் சுந்தராம்பாளை சந்தித்துப் பாராட்டினார் இந்திப் பாடகி லதா மங்கேஷ்கர்.

மறைந்த முன்னாள் முதல்வரும், திமுக தலைவருமான  மு. கருணாநிதி வசனம் எழுதிய பூம்புகார் படத்தில் கே.பி.எஸ். நடித்துள்ளார்.

ஜெயலலிதாவுடன் கந்தன் கருணை, சக்தி லீலை ஆகிய இரு படங்களில் கே.பி.எஸ். நடித்துள்ளார்.

தமிழ்த் திரையின் பிரபலமான நான்கு வேந்தர்களாளில் எம்.ஜி.ஆர். தவிர, மற்ற மூன்று நாயகர்களான சிவாஜி, ஜெமினி, எஸ்.எஸ்.ஆர். ஆகியோருடன் இவர் நடித்துள்ளார்.

”கலையைக் காப்பாற்றுவதாகப் பல கலைஞர்கள் கூறிக் கொள்ளும் வேளையில், என்னைப் பொறுத்தவரையில், கலைதான் என்னைக் காப்பாற்றுகிறது” என்றவர். கே.பி.எஸ்.

பல்வேறு சிறப்புகளை பெற்ற கே.பி.சுந்தராம்பாள் 1980ம் ஆண்டு  செப் 19இந்தேதி அன்று இவ்வுலகை விட்டு மறைந்தார்.

அவர் மறைந்தாலும் அவரது வெங்கலக்குரல் பாடல்கள் என்றும்  செவிகளில் ஒலித்துக்கொண்டேதான் இருக்கும்…