சென்னை: பாரதிதாசன் பல்கலைக்கழகத்துக்கு புதிய துணைவேந்தராக பேராசிரியா் செல்வம் நியமனம் செய்யப்பட்டு உள்ளார். அதற்கான உத்தரவை கவர்னர் பன்வாரிலால் புரோகித் வழங்கியுள்ளார்.
இதுதொடா்பாக ஆளுநா் மாளிகை வியாழக்கிழமை வெளியிட்டுள்ள செய்தியில் கூறியிருப்பதாவது,,
“திருச்சி பாரதிதாசன் பல்கலைக்கழகத்தின் துணைவேந்தராக செல்வத்தை தமிழ்நாடு ஆளுநா் பன்வாரிலால் புரோஹித் நியமனம் செய்துள்ளாா். இவா் பொறுப்பேற்றதில் இருந்து மூன்று ஆண்டுகள் பதவியில் இருப்பாா்.
பேராசிரியா் செல்வம், 36 ஆண்டுகள் ஆசிரியா் பணியில் அனுபவம் பெற்றவா். அழகப்பா பல்கலைக்கழகத்தில் பேராசிரியராகவும் துறைத் தலைவராகவும் பணியாற்றியுள்ளாா். இவா், 12 தலைப்புகளில் ஆராய்ச்சிக் கட்டுரைகளை வெளியிட்டுள்ளாா்.
அண்மையில் நடைபெற்ற சா்வதேச கருத்தரங்கில் 4 ஆராய்ச்சிக் கட்டுரைகளைச் சமா்ப்பித்துள்ளாா். தேசிய அளவிலான கருத்தரங்கில் 341 ஆராய்ச்சி கட்டுரைகளையும், சா்வதேச அளவில் 16 கருத்தரங்குகளையும் நடத்தியுள்ளாா்.
4 ஆராய்ச்சிகளை சிறப்பாக செய்துள்ளதுடன், 12 மாணவா்களுக்கு ஆராய்ச்சிப் படிப்புக்கான வழிகாட்டியாகவும் இருந்துள்ளாா்.
இவ்வாறு அதில் குறிப்பிடப்பட்டுள்ளது.
