சபரிமலை கோயில் நாளை நடைதிறப்பு: பாதுகாப்பு ஏற்பாடுகள் தீவிரம்

சபரிமலை ஐயப்பன் கோயிலில் அனைத்து வயது பெண்களையும் அனுமதிக்கலாம் என உச்ச நீதிமன்றம் தீர்ப்பளித்த நிலையில், நாளை கோயில் நடை திறக்கப்ப. இதனால் மாநிலம் முழுவதும் பதற்றம் நிலவி வருகிறது.

sabarimala

கேரள மாநிலம், சபரிமலை ஐயப்பன் கோயிலில் அனைத்து வயது பெண்களையும் அனுமதிக்கலாம் என உச்ச நீதிமன்றம் சமீபத்தில் தீர்ப்பளித்தது. இதற்கு எதிர்ப்பு தெரிவித்து கேரளா உள்பட நாடெங்கிலும் உள்ள ஐயப்ப பக்தர்கள் போராட்டத்தில் ஈடுபட்டு வருகின்றனர்.

இதனிடையே பிரச்சினைக்கு சமரச தீர்வு காணும் வகையில், பந்தளம் மன்னர் குடும்பத்திற்கு திருவிதாங்கூர் தேவசம் போர்டு அழைப்பு விடுத்தது. அதன்படி திருவனந்தபுரத்தில் உள்ள தேவசம்போர்டு தலைமை அலுவலகத்தில் இன்று காலை 10 மணிக்கு பேச்சு வார்த்தை தொடங்கியது. இதில், சபரிமலை கோவில் தந்திரிகள், பந்தளம் ராஜ குடும்பம், தந்தரிகள் சமாஜம், ஐயப்ப சேவா சங்கம், ஐயப்ப சேவா சமாஜம், யோக சேமசபா ஆகியோர் பங்கேற்றனர்.

அப்போது உச்ச நீதிமன்ற தீர்ப்பை எதிர்த்து மாநில அரசும், தேவசம் போர்டும் உடனடியாக மறு சீராய்வு மனு தாக்கல் செய்ய வேண்டும். அது தொடர்பான தீர்ப்பு வரும்வரை சபரிமலை கோயிலில் அனைத்து வயது பெண்களையும் அனுமதிக்கும் தீர்ப்பை நிறுத்தி வைக்க வேண்டும் என கூட்டத்தில் பங்கேற்றவர்கள் வற்புறுத்தினர்.

இதுகுறித்து இன்று செய்தியாளர்களிடம் பேசிய கேரள முதல்வர் பினராயி விஜயன், ” உச்ச நீதிமன்றத்தின் தீர்ப்பை எதிர்த்து மேல்முறையீடு செய்யப்படாது. தீர்ப்பு அனைத்து வகையிலும் செயல்படுத்தப்படும் ” என தெரிவித்தார். இதனிடையே சபரிமலை கோயில் நடை ஐப்பசி மாத பூஜைக்காக நாளை மாலை திறக்கப்படுகிறது. உச்ச நீதிமன்ற தீர்ப்பின் படி, அனைத்து வயது பெண்களும் சபரிமலை கோயிலுக்கு செல்ல தடை இல்லை என்பதால் நாளை முதலே பெண் பக்தர்கள் வருகை தருவார்கள் என எதிர்பார்க்கப்படுகிறது.

இந்நிலையில், சபரிமலைக்கு பெண் பக்தர்கள் சென்றால் அவர்களை பம்பை, நிலக்கல், பந்தளம் பகுதிகளில் தடுத்து நிறுத்துவோம் என்று இந்து அமைப்புகள் எச்சரித்து உள்ளன. சிவசேனா இது தொடர்பாக தற்கொலை மிரட்டலும் விடுத்துள்ளது. இதனால் சபரிமலை பகுதியில் சட்டம்- ஒழுங்கு பாதிக்கப்படும் சூழ்நிலை உருவாகி உள்ளதாக மாநில அரசுக்கு உளவுத்துறை எச்சரிக்கை விடுத்துள்ளது. இதையடுத்து கோயில் முழுவதும் பலத்த பாதுகாப்பு ஏற்படுத்தப்பட்டுள்ளது.