Random image

பிரபாகரனுடன் படம் எடுத்து அரசியல் செய்தவர் அல்ல வைகோ!: ம.தி.மு.க. மாநாட்டில் கி.வீரமணி பேச்சு

பிரபாகரனுடன் படம் எடுத்து அரசியல் செய்தவர் அல்ல வைகோ என்று ஈரோட்டில் நடைபெறும் ம.தி.மு.க. மாநாட்டில் திராவிடர் கழக தலைவர் கி.வீரமணி பேசினார்.

ஈரோட்டில் நடைபெறும் ம.தி.மு.க. முப்பெரும் விழாவில் கலந்துகொண்ட திராவிடர் கழக தலைவர் கி.வீரமணி, வைகோவிற்கு பொன்விழா பாராட்டுப் பட்டயம் வழங்கினார். பிறகு அவர் பேசியதாவது:

“இந்த பொன்விழாவிற்குப் பிறகுதான் வைகோவின் தியாக வாழ்க்கைக்குகான பலனை இந்த இனம் அறுவடை செய்ய இருக்கிறது.

விடுதலைப்புலிகள் தலைவர் பிரபாகரனுடன் படம் எடுத்து அரசியல் செய்பவர் அல்ல வைகோ. பிரபாகரனுக்காக அத்தனை அடக்குமுறை சட்டங்களையும் பதம் பார்த்தவர். அந்த சட்டங்கள் அனைத்தும் வைகோவிடம் தோற்றிருக்கின்றன.

இதற்கு முன் நாம் சந்தித்த எதிரிகள் நாணயமான எதிரிகள். இனிமேல் நாம் சந்திக்கவுள்ளவர்கள் நாணயமற்ற எதிரிகள். ஆகவே, இனிமேல் போர் வியூகத்தை மாற்ற வேண்டும்.

சமூகநீதி, ஜனநாயகம், மதச்சார்பின்மைக்கு ஆபத்து ஏற்பட்டுள்ள சூழலில் அதனை தடுத்து நிறுத்தும் ஆற்றல் திராவிட இயக்கத்திற்கே இருக்கிறது.

முதல்வர்கள், பிரதமர்கள் புரட்சியாளர்களாக வர முடியாது. வைகோ போன்றவர்கள்தான் புரட்சியாளர்களாக வர இயலும். அவர் எடுக்கும் முடிவுகளைக் கட்டுப்படுத்தும் இயக்கமாகவும் திராவிடர் கழகம் இருக்கிறது. வைகோவைப் பொறுத்தவரை நடந்தவை நடந்தவையாக இருக்கட்டும். இனி நடப்பவை இனத்திற்கும், உங்களுக்கும் பாதுகாப்பாகவும் இருக்கட்டும்” என்று கி.வீரமணி பேசினார்.