Random image

விராட் கோலி மற்றும் மீராபாய் சானு பெயர்கள் கேல் ரத்னா விருதுக்கு பரிந்துரை

இந்தியாவில் விளையாட்டு வீரர்களுக்கு வழங்கப்படும் விருதுகளில், மிக உயரிய விருதாக கருதப்படும் ராஜீவ் காந்தி கேல் ரத்னா விருதுக்கு இந்திய கிரிக்கெட் அணியின் கேப்டன் விராட் கோலியின் பெயர் பரிந்துரைக்கப்பட்டுள்ளது.

rajiv

இந்திய அரசு விளையாட்டுத் துறையில் சர்வதேச அளவில் சிறந்து விளங்கும் வீரர்களுக்கு அர்ஜுனா விருது உள்ளிட்ட பல்வேறு விருதுகளை வழங்கி வருகிறது. அந்த வகையில், இந்திய அரசால் விளையாட்டு வீரர்களுக்கு வழங்கப்படும் மிக உயரிய விருதாக கருதப்படுவது ராஜீவ் காந்தி கேல் ரத்னா விருது.

கடந்த 1991 ஆம் ஆண்டு முதல் வழங்கப்பட்டு வரும் இவ்விருதை இதுவரையில் 34 பேர் மட்டுமே பெற்றுள்ளனர். அதிலும், இந்திய கிரிக்கெட் அணியில் சச்சின் டெண்டுல்கர் மற்றும் தோனி ஆகியோர் மட்டுமே இந்த விருதைப் பெற்றுள்ளனர்.

இந்நிலையில், இந்த ஆண்டுக்கான ராஜீவ் காந்தி கேல் ரத்னா விருதுக்கு இந்திய அணியின் கேப்டன் விராட் கோலி மற்றும் பளு தூக்கும் வீராங்கனை மீராபாய் சானு ஆகிய இருவரின் பெயர்களை விளையாட்டுத் துறை, மத்திய அரசுக்கு பரிந்துரை செய்துள்ளது.

கோலி தற்போது உலகின் மிகச்சிறந்த பேட்ஸ்மேன்களில் ஒருவராக திகழ்ந்து வருகிறார். கடைசியாக இங்கிலாந்து தொடரில் பங்கேற்ற அவர், டி20, ஒருநாள் போட்டி மற்றும் டெஸ்ட் தொடர் மூன்றிலும் சிறப்பான ஆட்டத்தை வெளிப்படுத்தி, அதிக ரன் குவித்த வீரர்கள் பட்டியலில் முதலிடம் பிடித்தார் என்பது குறிப்பிடத்தக்கது.

அதேபோல், பளுதூக்கும் வீராங்கனையான மீராபாய் சானு, சமீபத்தில் நடைபெற்ற காமன்வெல்த் போட்டிகளில் 48 கிலோ எடைப்பிரிவில் தங்கம் வென்று, இந்தியாவுக்கு பெருமை சேர்த்துள்ளார் என்பது குறிப்பிடத்தக்கது.