உறவுகள் – கவிதை பகுதி 5
எந்நன்றி ,,,,,
பா. தேவிமயில் குமார்
இரந்துண்டு எங்கள்
இரைப்பையை
இயக்கிக் கொண்டிருக்கிறோம் !
தாளிக்கும் வாசனை
தெருவெங்கும் வீசுதே !
தருவீர்களா ? என
தேடுகிறேன் உணவை !
உங்களைத் தவிர
உறவென்பது
எங்களுக்கில்லையே !
ஏனிந்த பிரிவு நமக்குள் ? ?
தாய் தகப்பனையே
தவிக்க விடும்
இந்த உலகில்
எங்களைப் பார்க்க
உங்களுக்கேது நேரம் ???
உங்களையே
ஒரு காலத்தில்
நம்பி வந்தோம் ! இன்று
நாதியற்று இருக்கிறோம் !!
ஒரு காலத்தில்
உங்களுக்காகவே
வாழ்ந்தோம் !
உங்களிடமே
வளர்கிறோம் !
விரட்டினாலும்,
உங்கள் கால்களே
எங்கள் இல்லங்கள் !
பல்லாயிரம்
ஆண்டுகளாக
உங்களுக்குப்
பணிவிடை செய்தோம் !!
பாவப்பட்ட
பிறவிகளானோம்
நாங்கள் !
வெள்ளையனை
விரட்டிய
வரலாறு படிக்கும்
நாட்டில்,
நாளை,
எங்களை
அழித்த
வரலாறையும்
படிக்கப் போகிறீர்கள் !
என் நண்பன்
இவன் என
ஏற்றி வைத்த
எங்கள்
எஜமானர்களே !
இப்போது
“தெரு நாயே” என
தூற்றுவதேன் ?
கடவுள் வாகனமாகவும்,
காவல் புரிபவராகவும்,
பாசம் காட்டவும்,
போருக்கு செல்லவும்,
விசுவாசமாக இருக்கவும்
வேட்டைக்குப் போகவும்
பெண்ணுக்கு சீதனமாகவும்
போராட்ட குணத்திற்காகவும்,
அரசர்களும்,
ஆண்டிகளும்,
பொதுமக்களும்,
பாகுபாடில்லாமல்
பாசம் வைத்தனர்
எங்கள் மேல் !
வெளி நாட்டு ரகமெனவும்
உள் நாட்டு ரகமெனவும்
எங்களை
என்றோ,
சாதியாகப் பிரித்துவிட்டீர்கள் !
அதிலும்,
எங்களை
“அகதி”களைப் போல
அலைய விடுகிறீர்கள் !
பல்லாயிரம் ஆண்டுகளாக
பணிவிடை செய்தோம் !
இட்ட வேலையை
எட்டடி பாய்ந்து செய்தோம் !
விசுவாசமாக இருந்தவர்க்கு
“விஷம்” கொடுப்பதைப் போல
விரட்டி விரட்டி
அடிக்கிறீர்கள் !
வேறு எங்கு போவோம் ?
உங்களைத் தவிர
வேறெதுவும் அறியோம் !
காட்டு விலங்காக
இருந்த எங்களை
வீட்டு விலங்காக்கிட
அழைத்து வந்தீர்கள் !
விருப்பத்தோடு
வந்தோம்,
வாலாட்டிக் கொண்டே !
வாழ வைப்பீர்கள் என்ற
நன்றியுடன் ! மட்டுமல்ல
நம்பிக்கையுடனும் !
சிப்பிப்பாறை நாயும்,
செங்கோட்டை நாயும்,
கன்னி நாயும்,
கோம்பை நாயும்,
கட்டக்கால் நாயும்,
மண்டை நாயும்,
மந்தை நாயும்,
அலங்கு நாயும்,
அழிவில் இருக்கிறோம் !
எங்களைக் காப்பாற்றுங்கள் !
எங்களை,
எங்கோ எறிந்து விட்டு,
பாக்ஸர்,
பிட்டில்,
ராட்வீலர்,
ரெட்ரீவர்,
புல்மாஸ்டிக்,
குல்மாஸ்டிக்,
உல்ப்டக்,
திபெத்தியன் மாஸ்டிப்
என
தேடியலையும்
தோழர்களே !
நாங்கள் உங்களிடம்
நண்பனாக
மீண்டும் ஏங்குகிறோம்
மீட்டெடுப்பீர்களா ?
மறந்ததேன் ? எங்களை ?
மனசு வலிக்கிறது !
வேட்டைக்கு உதவிய
எங்களை
இன்று
பசியும்
பாராமுகமும்,
வேட்டையாடுகிறது !
“நன்றி கெட்ட நாயே”
என
நாக்கூசாமல் சொல்லும்
மனிதர்களே !
மனசார சொல்லுங்கள்….
நன்றி மறந்தவர்கள்
நாங்களா ?
இப்படிக்கு
தெரு நாயே ! என
துரத்தப்படும் நாட்டு நாய்கள்