போலீசாரால் சுட்டுக்கொல்லப்பட்ட விவேக் திவாரி குடும்பத்திற்கு ரூ.35 லட்சம் இழப்பீடு வழங்கப்படும் – யோகி ஆதித்யநாத்

போலீஸாரால் சுட்டுக்கொல்லப்பட்ட விவேக் திவாரி குடும்பத்துக்கு ரூ. 35 லட்சம் இழப்பீடு வழங்கப்படும் என உத்திரப்பிரதேச முதல்வர் யோகி ஆதித்யநாத் அறிவித்துள்ளார்.

yogi

லக்னோவில் ஆப்பிள் நிறுவனத்தின் விற்பனை பிரிவு மேலதிகாரியான விவேக் திவாரி மற்றும் அவருடன் பணிபுரியும் ஊழியர் சனா கான் ஆகிய இருவரும் காரில் சென்றுக்கொண்டிருந்தனர். அப்போது சோதனை சாவடியில் காவலர்கள் இருவர் காரை நிறுத்த கூறிய போது, விவேக் திவாரி காரை நிறுத்தாமல் சென்றதாக கூறப்படுகிறது. இதனால் ஆத்திரமடைந்த இரண்டு காவலர்களில் ஒருவர், கையிலிருந்த துப்பாகியால் விவேக் திவாரியை சுட்டுள்ளார். இதனால் படுகாயமடைந்த அவர், சம்பவ இடத்திலேயே உயிரிழந்தார்.

இந்த சம்பவம் தேசியளவில் சர்ச்சையை கிளப்பியது. இது தொடர்பாக பேசிய உள்துறை அமைச்சர் ராஜ்நாத் சிங், ஆப்பிள் ஸ்டோர் மேலாளர் விவேக் திவாரி மரணம் தொடர்பாக உரிய நடவடிக்கை எடுக்க வேண்டும் என உ.பி முதல்வர் யோகி ஆதித்யநாத்தை கேட்டுக்கொண்டார். இதையடுத்து துப்பாக்கிச்சூடு குறித்து விசாரிக்க சிறப்பு விசாரணைக் குழு அமைக்கப்பட்டுள்ள நிலையில், குற்றவாளிகளுக்கு உரிய தண்டனை பெற்றுத்தரப்படும் என முதல்வர் யோகி ஆத்தியநாத் உறுதியளித்துள்ளார்.

இந்நிலையில் இன்று விவேக் திவாரியின் குடும்பத்தினர் முதல்வர் யோகி ஆத்தியநாத் மற்றும் துணை முதல்வர் தினேஷ் ஷர்மா நேரில் சந்தித்து ஆறுதல் கூறினர். இந்த சந்திப்பானது 30 நிமிடங்கள் வரை நடந்தது. அதை தொடர்ந்து பேசிய முதல்வர் ஆதித்யநாத், உயிரிழந்த விவேக் திவாரியின் குடும்பத்துக்கு ரூ. 25 லட்சமும், அவரது குழந்தைகளின் கல்வி செலவுக்கு ரூ. 5 லட்சமும், அவரது வயதான தாயாருக்கு ரு. 5 லட்சம் என மொத்த ரூ. 35 லட்சம் இழப்பீடு வழங்கப்படும் என உத்தரவு பிறப்பிக்கப்பட்டுள்ளதாக தெரிவித்தார்.

விவேக் திவாரி சுட்டுக்கொல்லப்பட்ட சம்பவத்தை தொடர்ந்து காங்கிரஸ் உள்ளிட்ட எதிர்கட்சிகள் முதல்வர் யோகி ஆதித்யநாத் அரசு மீது கடும் விமர்சனங்களை முன்வைத்து வருகிறது.