காலிஸ்தான் பிரிவினைவாதி குர்பத்வந்த் சிங் பன்னூன் தொடர்ந்த வழக்கில், இந்திய தேசிய பாதுகாப்பு ஆலோசகர் அஜித் தோவல் மற்றும் உளவு அமைப்பான ‘ரா’வின் முன்னாள் தலைவர் சமந்த் கோயல் ஆகியோருக்கு நீதிமன்ற சம்மன் அனுப்ப டெல்லி நீதிமன்றங்களின் உதவியை நாடுமாறு அமெரிக்காவின் ஃபெடரல் நீதிமன்றம் உத்தரவிட்டுள்ளது.

பயங்கரவாதம் தொடர்பான பல்வேறு குற்றச்சாட்டுகளை எதிர்கொண்டுள்ள பன்னூன், அமெரிக்காவில் செயல்படும் தடை செய்யப்பட்ட ‘சீக்கியர்களுக்கான நீதி’ (Sikhs for Justice – SFJ) அமைப்பின் சட்ட ஆலோசகராக இருந்து வருகிறார்.

கடந்த நவம்பர் 13-ஆம் தேதி இந்த உத்தரவு பிறப்பிக்கப்பட்டுள்ளது. நியூயார்க்கின் தெற்கு மாவட்ட நீதிமன்ற நீதிபதி கேத்தரின் போல்க் ஃபெய்லா பிறப்பித்த உத்தரவில், அஜித் தோவலுக்கு சம்மன் அனுப்ப பாட்டியாலா ஹவுஸ் மாவட்ட நீதிமன்றத்தையும், சமந்த் கோயலுக்கு சம்மன் அனுப்ப துவாரகா மற்றும் தீஸ் ஹசாரி மாவட்ட நீதிமன்றங்களையும் அணுகுமாறு தெரிவிக்கப்பட்டுள்ளது.

இதுதொடர்பாக நீதிமன்ற உத்தரவில், “இந்த சிவில் வழக்கில் எதிர்மனுதாரர்களுக்கு நீதிமன்ற சம்மன்களைச் சேர்ப்பதற்கான நடைமுறையில் உதவுமாறு இந்திய நீதிமன்றங்களை மரியாதையுடன் கேட்டுக்கொள்கிறோம்” என்று குறிப்பிடப்பட்டுள்ளது.

இதற்காக ஹேக் மாநாட்டு விதிகள் மற்றும் இந்தியாவின் உரிமையியல் நடைமுறைச் சட்டம் (CPC) ஆகியவை சுட்டிக்காட்டப்பட்டுள்ளன. வெளிநாட்டு நீதிமன்றங்கள் இந்திய நீதிமன்றங்கள் மூலமாகவும் சம்பந்தப்பட்ட நபர்களுக்கு சம்மன் அனுப்ப முடியும் என்று நீதிபதி தெரிவித்துள்ளார்.

மத்திய அரசு அறிவிக்கை வெளியிட்டுள்ள வெளிநாட்டு சிவில் நீதிமன்றங்களிலிருந்து வரும் சம்மன்களை இந்திய நீதிமன்றங்களுக்கு அனுப்பி, அவற்றை உள்நாட்டு நீதிமன்றங்களின் சம்மன்களைப் போலவே செயல்படுத்த இந்திய உரிமையியல் நடைமுறைச் சட்டம் அனுமதிக்கிறது.

ஏற்கெனவே நிராகரிக்கப்பட்ட சம்மன் அனுப்பும் முயற்சி!

ஹேக் மாநாட்டு விதிகளின்படி, இந்தியாவின் மத்திய அதிகார அமைப்பு மூலமாக அஜித் தோவல் மற்றும் சமந்த் கோயலுக்கு சம்மன் அனுப்ப அமெரிக்க நீதிமன்றம் ஏற்கெனவே முயற்சி செய்தது. ஆனால், அந்தக் கோரிக்கை நிராகரிக்கப்பட்டது.

இதையடுத்து, ஹேக் மாநாட்டின் 19-ஆவது பிரிவு மற்றும் இந்திய உரிமையியல் நடைமுறைச் சட்டத்தின் தொடர்புடைய விதிகளின்படி மாற்று வழியில் சம்மன் அனுப்ப அமெரிக்க நீதிமன்றம் அனுமதி அளித்துள்ளது.

தன்னைக் கொலை செய்ய சதி திட்டம் தீட்டப்பட்டதாகவும், அதற்கு இழப்பீடு வழங்க வேண்டும் என்றும் கோரி பன்னூன் இந்த சிவில் வழக்கைத் தொடர்ந்துள்ளார். இந்தியாவின் வெளிநாட்டு உளவு அமைப்பான ‘ரா’வின் உதவியுடன் தேசிய பாதுகாப்பு ஆலோசகர் அஜித் தோவல் இந்தச் சதித் திட்டத்தைத் தீட்டியதாக அவர் குற்றம்சாட்டியுள்ளார்.

கடந்த மாதம் அமெரிக்க வெளியுறவுத் துறையும் தூதரக ரீதியிலான கடிதம் மூலம் வாஷிங்டனில் உள்ள இந்தியத் தூதரகத்துக்கு சம்மன்களை அனுப்ப முயற்சி செய்தது.

ஆனால், இந்த வழக்கை இந்தியா நிராகரித்துள்ளது. இதுகுறித்து நவம்பர் 10-ஆம் தேதி இந்திய வெளியுறவுத் துறை செய்தித் தொடர்பாளர் ரண்தீர் ஜெய்ஸ்வால் கூறுகையில், “இந்தியாவின் உயர் அதிகாரிகளுக்கு எதிராகப் புனையப்பட்டுள்ள அடிப்படையற்ற, உள்நோக்கம் கொண்ட குற்றச்சாட்டுகளை வன்மையாகக் கண்டிக்கிறோம். ஆதாரமற்ற வழக்குகளையும் நிராகரிக்கிறோம். இந்தியாவில் நீதிமன்ற ஆவணங்களைச் சேர்ப்பதற்கான கோரிக்கைகள், இந்தியாவின் அதிகாரப்பூர்வ மத்திய அமைப்பான சட்டம் மற்றும் நீதித்துறை அமைச்சகம் மூலமாகவே சமர்ப்பிக்கப்பட வேண்டும்” என்று தெரிவித்தார்.

பின்னணி: அமெரிக்காவில் பன்னூனைக் கொலை செய்ய முயன்றதாகத் தொடரப்பட்ட வழக்கில், இந்திய வம்சாவளியைச் சேர்ந்த நிகில் குப்தா தனது குற்றத்தை ஒப்புக்கொண்டுள்ளார். இந்த விவகாரம் இந்தியா – அமெரிக்கா இடையிலான உறவுகளிலும் கவனம் பெற்றுள்ளது.